لاہور(این این آئی) مسلم لیگ(ن)پنجاب کی سیکرٹری اطلاعات عظمی بخاری نے کہا ہے کہ لاہور ڈوب رہا ہے اور عثمان بزدار تلاش گمشدہ ہیں،لاہور کی سڑکیں،گلیاں اور مارکیٹیں بارش کے پانی سے بھری پڑی ہیں،وزیراعلی بھی غائب،45وزرابھی غائب،واسا بھی غائب،لوکل انتظامیہ بھی غائب ہے،لاہور اب بارش کے پانی کے رحم و کرم پر ہے۔ اپنے بیا ن میں انہوںنے کہاکہ تین سالوں سے لاہور کے سیوریج سسٹم کی صفائی نہیں ہوسکی۔نالائق بزدار حکومت اگر سیوریج کے نئے پائپ نہیں ڈال سکتی تو ان کی کم از کم صفائی کرلیتی،شہبازشریف کو لمبے بوٹوں کا طعنہ دینے والے ارسطو وزیر بھی غائب ہیں۔مراد راس،میاں اسلم اقبال اور محمود الرشید بھی کسی بل میں چھپ گئے ہیں۔عثمان بزدار اور انکے وزرافوٹو سیشن کرانے کیلئے ہی بارش میں نکل آتے،ٹھگ انسٹیٹیوٹ آف پاکستان صرف مال بنا پروگرامز میں ہی پیش پیش ہوتا ہے۔لاہور کے عوام آج شدت کے ساتھ اپنے خادم اعلی کو یاد کررہے ہیں۔
