سکھر(این این آئی)پاکستان پیپلز پارٹی کے سینئر رہنمااورسابق اپوزیشن لیڈر سید خورشیداحمد شاہ نے وزیرِ اعظم کو تنقید کا نشانہ بناتے ہوئے کہا ہے کہ عمران خان ملک کے لیے سیکیورٹی رسک بن گئے ہیں،عمران خان نے قوم کو دھوکہ دیا اور جھوٹ بولا، آج لانے والے بھی پریشان ہیں۔جمعہ کوسکھر کی احتساب عدالت میں پیشی کے بعدمیڈیا سے گفتگو کرتے ہوئے خورشید شاہ نے کہا کہ موجودہ حکمراں عوام کو ریلیف فراہم کرنے میں ناکام ہو چکے ہیں۔انہوں نے کہا کہ جو حکومت معیشت نہیں سنبھال سکتی اسے اقتدار کا بھی حق نہیں۔پارلیمنٹ کو نظر انداز کرنے کے باعث ملک میں بحران پیدا ہوئے۔ عمران خان نے قوم کو دھوکہ دیا اور جھوٹ بولا، آج لانے والے بھی پریشان ہیں۔انہوں نے کہاکہ عدالتوں سے مطالبہ ہے کہ جھوٹ بولنے والوں کے خلاف 62 اور 63 کے مطابق کارروائی کی جائے۔جیل سے باہر آنے کے بعد اسلام آباد جاتے ہی اپوزیشن کو یکجا کرنے کی کوشش کروں گا۔انہوں نے کہاکہ ہر طبقہ سراپا احتجاج ہے، مظاہرین کو سنبھالنے کی حکومت کے پاس اہلیت نہیں۔خورشید شاہ نے کہاکہ میڈیا کی آزادی پر قدغن برداشت نہیں کریں گے،کسی بھی چینلز کی بندش کی مذمت کرتا ہوں، تمام ورکرز کو حقوق دیئے جائیں۔
