تہران (این این آئی )ایران میں کرونا وائرس کی دوسری لہر جاری ہے اوراس دوران ایران میں اس وبا سے ہر پانچ منٹ بعد ایک شخص دم توڑ رہا ہے۔ غیرملکی خبررساں ادارے کے مطابق ایران کے نائب وزیرِ صحت ایرج حریرچی تبریزی نے کہاکہ وبا کی لپیٹ میں آنے والوں کا یہی حال رہا تو اگلے دنوں میں ہر روز چھ سو افراد کی موت کا امکان ہے۔ انہوں نے اپنی عوام سے کہا کہ وہ احتیاط کا دامن ہاتھ سے مت چھوڑیں اور حکومتی اقدامات کا احترام ہر ممکن انداز میں کریں۔طبی طور پر کمزور اور کم قوت مدافعت رکھنے والے لوگوں پر کوئی بھی وائرس حملہ آور ہو سکتا ہے۔ وٹامن سی قوت مدافعت بڑھانے میں اہم کردار ادا کرتا ہے۔ اس مقصد کے لیے لیموں اور دیگر پھلوں کا استعمال اہم ہے۔ابھی تک ایسا محسوس کیا جا رہا ہے کہ عوام احتیاطی ضابطوں کا مناسب انداز میں احترام نہیں کر رہے۔ تمام تر احتیاطی تدابیر کے ساتھ مشرقِ وسطی میں کورونا وائرس کی نئی قسم سے پھیلنے والی بیماری کووڈ انیس نے ایران کو انتہائی سنگینی کے ساتھ اپنی لپیٹ میں لے رکھا ہے۔
