یوکرین سے اپنے شہریوں کے انخلا کے لیے پروازوں کا بندوبست نہیں کریں گے،امریکا

واشنگٹن(این این آئی)امریکی وزارت خارجہ نے ایک اعلان میں بتایا ہے کہ وہ یوکرین سے اپنے شہریوں کو نکالنے کے انتظامات کرنے کا ارادہ نہیں رکھتی ہے۔ اس حوالے سے امریکی شہریوں کو آزادی دی گئی ہے کہ وہ روس کے ممکنہ حملے کے اندیشے کے پیش نظر تجارتی پروازوں کے ذریعے یوکرین چھوڑ سکتے ہیں۔میڈیارپورٹس کے مطابق امریکی وزارت خارجہ کی خاتون ترجمان کا کہنا تھا کہیوکرین میں امریکی سفارت کاروں اور ان کے اہل خانہ کی موجودگی کے حوالے سے ہمارے موقف میں تبدیلی کی صورت میں امریکیوں کو حکومت کی جانب سے انخلا کی کارروائیوں پر انحصار نہیں کرنا چاہیے۔ اس وقت تجارتی پروازیں جاری ہیں جن کے ذریعے کوچ کیا جا سکتا ہے۔اس سے قبل امریکی انتظامیہ نے اپنے شہریوں کو ہدایت دی تھی کہ وہ یوکرین کا رخ نہ کریں۔ ساتھ ہی آگاہ کیا گیا تھا کہ ایسی معلومات موجود ہیں کہ روس یوکرین کے خلاف ایک بڑی فوجی کارروائی کی تیاری کر رہا ہے۔