اسلام آباد (این این آئی) حریت رہنما عبد الحمید لون نے کہاہے کہ وزیراعظم پاکستان عمران خان کے گلگت بلتستان کو عبوری صوبہ بنانے کے اعلان کا خیر مقدم کرتے ہیں۔اپنے بیان میں عبدالحمید لون حریت رہنما نے کہاکہ گلگت بلتستان کو صوبہ بنانا اس علاقے کے غیور عوام کا دیرینہ مطالبہ تھا۔انہوںنے کہاکہ گلگت بلتستان کو صوبہ بنانے کے پاکستانی اقدام کو بھارت کے سامراجی اقدام کے ساتھ جوڑنا ایک غیر حقیقت پسندانہ سوچ ہے۔عبدالحمید لون حریت رہنما نے کہاکہ بھارت جموں و کشمیر کو اپنا اٹوٹ انگ قرار دیتا ہے جبکہ پاکستان گلگت بلتستان سمیت پورے جموں و کشمیر کے حق خودارادیت کا حامی ہے۔انہوںنے کہاکہ بھارت کی حیثیت غاصب کی ہے جبکہ پاکستان پشتیبان اور وکیل ہے۔انہوںنے کہاکہ جموں و کشمیر کے حوالے سے بھارت اور پاکستان کے طرز عمل میں زمین و آسمان کا فرق ہے۔ انہوںنے کہاکہ بھارت مقبوضہ جموں و کشمیر پر غیر قانونی اور غیر آئینی طور پر جبری قابض ہے۔انہوںنے کہاکہ بھارت جھوٹے دعوں سے مقبوضہ جموں کشمیر کی آئینی اور قانونی حثیت کو تبدیل نہیں کرسکتا ہے۔عبدالحمید لون حریت رہنما نے کہاکہ مقبوضہ جموں وکشمیر کے مستقل کا حل اقوام متحدہ کی قراردادوں کے اندر مضمر ہے۔
