اسلام آباد(این این آئی)وفاقی وزیر برائے صحت عبدالقادر پٹیل نے کورونا وائرس کی بڑھتی شرح کے پیشِ نظر کہا ہے کہ این ڈی ایم اے اور متعلقہ اداروں کی تیاری مکمل ہے تاہم اسمارٹ لاک ڈاون پر فی الحال غور نہیں کیا جا رہا، امید ہے اس کی ضرورت نہیں پڑے گی۔عبدالقادر پٹیل نے میڈیا سے گفتگو کترے ہوئے کہ کورونا وائرس سے اموات کی شرح 1.5 فیصد ہے، وینٹی لیٹرز کی مناسب تعداد ہسپتالوں میں موجود ہے، ہسپتالوں میں کورونا وائرس کے بڑھتے مریضوں کی تعداد پر تشویش ہے۔انہوں نے کہا کہ کراچی میں کورونا وائرس کے کیسز میں اضافے پر ٹیسٹنگ کی شرح بڑھا رہے ہیں، کورونا وائرس سے ویکسینیٹڈ افراد ملک کی کْل آبادی کا 86 فیصد ہیں۔عبدالقادر پٹیل نے عوام سے اپیل کرتے ہوئے کہا ہے کہ شہری عید کے بعد سیاحتی مقامات پر رش سے گریز کریں۔اْن کا کہنا ہے کہ کورونا کی ایس او پیز پر عمل درآمد کے لیے آگاہی مہم شروع کی جا رہی ہے، سماجی فاصلہ، سینیٹائزر اور ماسک کا استعمال یقینی بنائیں۔
