یومِ شہداء پر کشمیریوں کے ساتھ کھڑے ہیں، وزیر اعظم عمران خان کا تیرہ جولائی کے شہداء کو خراج عقید ت

0
215

اسلام آباد (این این آئی)وزیر اعظم پاکستان عمران خان نے کہا ہے کہ یومِ شہدائے کشمیر پر کشمیریوں کے ساتھ کھڑے ہیں، ہم 13 جولائی 1931ء کے شہداء کو خراجِ عقیدت پیش کرتے ہیں۔سماجی رابطے کی ویب سائٹ ٹوئٹر پر جاری کیئے گئے ایک بیان میں وزیرِ اعظم عمران خان نے کہا ہے کہ 13 جولائی 1931ء کو مہاراجہ ڈوگرا کے فوجیوں نے پرامن مظاہرین پر فائرنگ کی۔انہوں نے کہا کہ بھارتی قبضے اور ظلم و بربریت کے خلاف کشمیریوں کی جدوجہد، مزاحمت اور قربانیوں کی ایک تاریخ ہے۔وزیرِاعظم عمران خان نے کہا کہ ڈوگرا مہاراجہ کے سپاہیوں کی پر امن مظاہرین پر فائرنگ کے نتیجے میں 22 کشمیری شہید ہوئے۔انہوں نے کہا کہ بھارتی ظلم و بربریت کے خلاف کشمیریوں کی مزاحمت کا جذبہ آج بھی زندہ ہے۔وزیرِ اعظم عمران خان نے کہا کہ کشمیری مرد اور خواتین بھارت کے غیر قانونی قبضے کے خلاف لڑائی جاری رکھے ہوئے ہیں۔انہوں نے کہا کہ کشمیریوں کو اقوامِ متحدہ کی قرار دادوں کے مطابق حقِ خودارادیت ملنے تک کوئی سمجھوتہ نہیں کریں گے۔وزیرِ اعظم پاکستان عمران خان نے کہا کہ پاکستان کشمیریوں کی جدوجہد میں ان کے ساتھ کھڑا ہے۔