بھارت کے بے بنیاد الزامات نے اس کے جھوٹے بیانیے کو بے نقاب کردیا، سردار مسعود خان

اسلام آباد(این این آئی) امریکہ، چین و اقوام متحدہ میں پاکستان کے سابق سفیر اور آزاد جموں و کشمیر کے سابق صدر سردار مسعود خان نے کہا ہے کہ ایک پاکستانی ریٹائرڈ فوجی کے زندہ حالت میں میڈیا کے سامنے آنے سے بھارتی حکام اور میڈیا کی جانب سے اس کی شناخت اور ہلاکت سے متعلق دعوؤں کی قلعی کھل گئی۔ہفتہ کے روز اپنے ایک بیان میں سردار مسعود خان نے کہا کہ بھارتی حکام اور میڈیا نے محمد آصف نامی ریٹائرڈ پاکستانی فوجی کو مقبوضہ جموں و کشمیر میں ہلاک ہونے والا عسکریت پسند قرار دیا تھا، تاہم یکم اکتوبر کو پاک فوج نے انہیں زندہ حالت میں میڈیا کے سامنے پیش کردیا۔ ان کے مطابق یہ واقعہ حساس سکیورٹی معاملات سے متعلق دعوؤں کو ضروری تصدیق کے بغیر جاری کرنے اور انہیں وسیع پیمانے پر نشر کرنے کے خطرات کو اجاگر کرتا ہے۔انہوں نے کہا کہ حساس نوعیت کے واقعات سے متعلق معلومات کو نشر کرنے سے قبل آزادانہ طور پر جانچنا ضروری ہے، بالخصوص ایسی صورت میں جب غیر مصدقہ دعوے پاکستان اور بھارت کے باہمی تعلقات پر اثرانداز ہو سکتے ہوں۔سردار مسعود خان نے کہا کہ صحافیوں اور میڈیا اداروں کی ذمہ داری ہے کہ حکومتی یا عسکری ذرائع سے منسوب معلومات سمیت ہر دعوے کی صحت کو یقینی بنائیں۔ معلومات کی متعدد ذرائع سے تصدیق کی جانی چاہیے اور جہاں حقائق مکمل طور پر واضح نہ ہوں وہاں شکوک و شبہات کو بھی واضح طور پر بیان کیا جانا چاہیے۔انہوں نے اس واقعے کو پاکستان کے خلاف اطلاعاتی جنگ اور بیانیہ سازی کے وسیع تر رجحان کا حصہ قرار دیتے ہوئے پلوامہ، اُڑی اور پہلگام کے واقعات کا بھی حوالہ دیا اور کہا کہ پاکستان سے متعلق الزامات کو حقائق سامنے آنے اور قابلِ تصدیق شواہد دستیاب ہونے سے قبل میڈیا میں بڑھا چڑھا کر پیش نہیں کیا جانا چاہیے۔سردار مسعود خان نے پاکستان کے خلاف منظم اطلاعاتی مہمات سے متعلق مختلف رپورٹس اور تحقیقی مطالعات کا حوالہ دیتے ہوئے 2020 میں یورپی یونین ڈس انفولیب سے منسوب تحقیق کا بھی ذکر کیا، جس میں ویب سائٹس اور میڈیا اداروں کے مختلف نیٹ ورکس کی نشاندہی کی گئی تھی جو پاکستان کے خلاف استعمال کی گئیں۔ سردار مسعود خان کا کہنا تھا کہ ایسی سرگرمیوں کا مقصد پاکستان کی بین الاقوامی ساکھ کو متاثر کرنا اور مسئلہ کشمیر کے حوالے سے پاکستان کے مؤقف کو کمزور کرنا رہا ہے۔انہوں نے کہا کہ حالیہ واقعے کا وقت بھی اہم ہے کیونکہ پاکستان اقوام متحدہ کی جنرل اسمبلی کے اجلاس کے موقع پر فعال سفارتی سرگرمیوں میں مصروف ہے۔