پمزاسپتال میں اصلاحات کا پلان تیار، 3 ماہ کا ہدف مقرر

اسلام آباد(این این آئی)انسٹی ٹیوٹ آف میڈیکل سائنسز (پمز)میں سانحے کے بعد نئے ایگزیکٹو ڈائریکٹر پروفیسر ڈاکٹر تنویر خالق نے بڑے پیمانے پر ادارہ جاتی اصلاحات کا اعلان کر دیا۔ اصلاحاتی اقدامات میں اسپتال کے انفرا اسٹرکچر کی جدید کاری، طبی سہولتوں کی بہتری اور تعلیمی سرگرمیوں میں توسیع شامل ہے، جبکہ مریضوں کو ادویات کی بلا تعطل فراہمی کے لیے بھی اہم فیصلے کیے گئے ہیں۔پمز انتظامیہ کے مطابق مدر اینڈ چائلڈ ہیلتھ سینٹر کی بحالی اور توسیع کے ذریعے بستروں کی گنجائش اور آپریٹنگ سوئٹس کی تعداد بڑھائی جا رہی ہے۔ پوسٹ گریجویٹ ٹرینیز، ہاس آفیسرز اور نرسنگ عملے کے شفاف انتخاب کے لیے فیڈرل سینٹرل انڈکشن پالیسی نافذ کر دی گئی ہے، جس کے تحت متعلقہ عملے کے انتخاب کا عمل انجام دیا جائے گا۔ یونیورسٹی کے الحاق سے بریسٹ، کولوریکٹل، ہیپاٹو بلیئری اور منیمل ایکسیس سرجری میں ماسٹرز کے خصوصی تعلیمی پروگرام شروع کیے گئے ہیں۔ ایگزیکٹو ڈائریکٹر پروفیسر ڈاکٹر تنویر خالق نے تھوراسک سرجری کا مخصوص شعبہ قائم کرنے اور ایک میڈیسن ڈیپارٹمنٹ کی باقاعدہ منصوبہ بندی کا بھی اعلان کیا ہے، جسے ادارے کی تعلیمی اور طبی توسیع کا حصہ بنایا گیا ہے۔