پاکستان سپر لیگ کے گیارہویں سیزن کا فائنل میچ پشاور زلمی اور حیدرآباد کنگز کے درمیان لاہور کے قذافی اسٹیڈیم میں آج کھیلا جائے گا۔ دونوں ٹیمیں ٹرافی اپنے نام کرنے کے لیے آج میدان میں اتریں گی، جس کے لیے شائقینِ کرکٹ میں بھی زبردست جوش و خروش پایا جا رہا ہے۔
اتوار کی شام میچ شروع ہونے سے پہلے اسٹیڈیم میں ایک بڑی اختتامی تقریب ہوگی جس میں عاطف اسلم، علی عظمت، عارف لوہار، آئمہ بیگ اور صابری سسٹرز اپنے فن کا مظاہرہ کریں گے۔ پی سی بی کے چیئرمین محسن نقوی نے شائقین سے کہا ہے کہ وہ شام 6 بجے تک اسٹیڈیم پہنچ جائیں تاکہ وہ اس تقریب سے پوری طرح لطف اندوز ہو سکیں۔
اس بار پی سی بی نے انعامی رقم میں بھی بڑا اضافہ کیا ہے۔پی ایس ایل 11 کا فائنل جیتنے والی ٹیم کو مجموعی طور پر 10 لاکھ ڈالر (تقریباً 28 کروڑ روپے) ملیں گے، جبکہ فائنل ہارنے والی ٹیم کو 5 لاکھ ڈالر دیے جائیں گے۔ اس کے علاوہ، جو ٹیم نئے کھلاڑیوں کو سامنے لانے میں سب سے بہتر رہی، اسے بھی 2 لاکھ ڈالر کا انعام ملے گا۔
انتظامات کے حوالے سے وزیراعظم شہباز شریف اور چیئرمین پی سی بی محسن نقوی کی ملاقات بھی ہوئی ہے، جس میں وزیراعظم نے ہدایت کی ہے کہ عوام کی سہولت کے لیے بہترین سیکیورٹی اور ٹریفک کے انتظامات کیے جائیں۔ حیدرآباد کنگز کی ٹیم پہلی بار فائنل کھیل رہی ہے جبکہ پشاور زلمی کا شمار لیگ کی سب سے تجربہ کار ٹیموں میں ہوتا ہے، جس کی وجہ سے آج ایک دلچسپ مقابلے کی امید ہے۔
رپورٹ: عبید الرحمان
