تحریک انصاف اب بھی اپنا آئینی و قانونی کردار نبھائے تو سوچا جا سکتا ہے،رانا ثناء اللہ

اسلام آباد(این این آئی)وزیر اعظم کے مشیر سینیٹر رانا ثناء اللہ نے کہا ہے کہ خیبر پختونخوا حکومت آئینی و قانونی کردار ادا کرنے پر رضا مند ہوجاتی تو عبوری نظام کی ضرورت ہی نہیں تھی، اب بھی پی ٹی آئی اپنا آئینی و قانونی کردار نبھائے تو سوچا جا سکتا ہے۔ایک انٹرویو میں رانا ثناء اللہ نے کہاکہ دہشت گردی کیخلاف قوم متحدہ نہ ہوئی، صوبائی اور مرکزی حکومت کی ایک پالیسی نہ ہوئی تو ملک کے وجود کو خطرہ ہے۔ رانا ثناء اللہ نے کہا کہ بانی پی ٹی آئی جب وزیراعظم تھے تو انہوں نے اپوزیشن لیڈر کو فون تک نہیں کیا، موجودہ وزیر اعظم جب بھی ایوان میں آتے ہیں تو اپوزیشن لیڈر سے ہاتھ ملاتے ہیں، اپوزیشن اپنے رویوں کی وجہ سے نقصان اٹھا رہی ہے۔انہوں نے کہا کہ مجھے خود افسوس ہے کہ بانی پی ٹی آئی کی بہنوں کو نظر بند کرنا پڑا، سب کو معلوم ہے کہ وہ لانگ مارچ کے حوالے سے کیا گفتگو کرتی تھیں، ان کی بہنوں نے گورنر ہائوس پر چڑھائی کرنے کے بیانات دئیے، پی ٹی آئی کا سوشل میڈیا بھی کس قسم کی گفتگو کرتا رہا، یہ سب کے علم میں ہے، صورت حال کو قابو میں رکھنے کیلئے نظر بندی مجبوری تھی۔رانا ثناء اللہ نے خبردار کیا کہ دہشت گردی کا فوری خاتمہ نہ کیا گیا اور قوم سمیت وفاقی و صوبائی حکومتیں ایک پالیسی پر متحد نہ ہوئیں تو پاکستان کے وجود کو خطرہ لاحق ہوسکتا ہے۔انہوں کہاکہ بھارت اب پاکستان کے ساتھ روایتی جنگ نہیں لڑ سکتا،پورا خطہ پاکستان کو سیکیورٹی فراہم کرنے والے ملک کے طور پر دیکھ رہا ہے۔وزیر اعظم کے مشیر نے یہ بھی کہا کہ بھارت نے افغانستان میں اپنے ٹھکانے قائم کر لیے ہیں اور پیسے دے کر دہشت گردی کروا رہا ہے۔