مقبوضہ جموں کشمیر ، بھارتی یوم جمہوریہ کو یوم سیاہ کے طورپر منانے کے حوالے سے پوسٹر چسپاں

    0
    69

    سرینگر (این این آئی)بھارت کے غیر قانونی زیر قبضہ کشمیر میں” تحریک آزادی جموں وکشمیر اور جموں وکشمیر لبریشن الائنس ” نے مختلف علاقوں میں پوسٹر چسپاں کیے ہیں جن میں لوگوں سے کہا گیا ہے کہ وہ غیر قانونی بھارتی قبضے کے خلاف اپنا احتجاج ریکارڈ کرانے کیلئے 26جنوری کوبھارتی یوم جمہوریہ یوم سیاہ کے طورپر منائیںاور اس روز مکمل ہڑتال کریں۔کشمیر میڈیا سروس کے مطابق یہ پوسٹر سرینگر، بڈگام ، گاندر بل ، پلوامہ ، اسلام آباد، شوپیاں ، کولگام ، بارہمولہ اور بانڈی پورہ کے علاقوں میں دیواروں اورکھمبوں پر چسپاں کیے گئے ہیں۔ پوسٹرں میں بزرگ حریت رہنما سید علی گیلانی ، مسرت عالم بٹ ، محمد اشرف صحرائی ،شبیر احمد شاہ، محمد یاسین ملک، آسیہ اندرابی، نعیم احمد خان، ڈاکٹر عبدالحمید فیاض کی تصاویر موجود ہیں ۔ پوسٹروں میں تحریر ہے کہ ”بھارتی جمہوریت فریب اور دھوکہ ہے ،استحصالی اور غیر جمہوری اقدامات اقوام عالم کے لیے چشم کشا ہیں،26جنوری کو یوم جمہوریہ وہ بھارت مناتا ہے جہاں سب سے زیادہ جمہوریت کی پامالی ہوتی ہے،بھارت پر اس وقت عملاً راشٹریہ سوایم سیوک سنگھ کی حکومت ہے جو اپنا مذموم ایجنڈہ پورا کرنے کیلئے تمام اخلاقی اقدار پامال ، اقلیتوں کے حقوق پر غاصبانہ یلغار اور انسانیت کش اقدمات کر رہی ہے،” پوسٹر وں میں درج تحریر میں امید ظاہر کی گئی ہے کہ مقبوضہ جموںوکشمیر کے عوام ہمیشہ کی طرح اپنی ایمانی طاقت اور صبر و استقامت سے بھارت کے تمام ہتھکنڈوں کو ناکام بنائیں گے۔