بیجنگ (این این آئی)چین کے صدر شی جن پنگ اور وزیراعظم لی کی چیانگ نے صدر عارف علوی اور وزیراعظم شہباز شریف کیلئے خصوصی پیغام میں پاکستان میں سیلاب سے جانی ومالی نقصانات پر پاکستان کی قیادت اور عوام سے افسوس اور بھرپور یک جہتی کا اظہار کیا ہے ۔چین کے صدر اور وزیراعظم کا پیغام پاکستان میں چین کے سفیر نونگ رونگ نے پاکستانی قیادت کو پہنچایا۔وزیراعظم شہباز شریف نے چین کے صدر شی جن پنگ اور وزیراعظم لی کی چیانگ کے لئے نیک تمناؤں کا اظہار کیا ۔ وزیر اعظم نے کہاکہ ہمیشہ کی طرح چین کی قیادت اور عوام نے پاکستان دوستی اور فراخ دلی کا مظاہرہ کیا ہے،محترم صدر شی جن پنگ اور وزیراعظم لی کی چیانگ کو تہہ دل سے شکریہ ادا کرتا ہوں۔چین کی طرف سے پاکستان کے سیلاب متاثرین کے لئے 100 ملین یوآن (آر ایم بی) امداد کا اعلان کیا گیا ،چین کی طرف سے25000 خیموں اور دیگر امدادی اشیاء کا عطیہ کیا گیا ،چین کی فضائیہ کی پروازیں 300 خیموں کی پہلی کھیپ لے کر کراچی پہنچیں گی ،پاکستان میں چین کے سفیر نونگ رونگ کراچی میں امدادی سامان پاکستانی حکام کے حوالے کریں گے ،چین کی طرف سے سیلاب متاثرین کے لئے امداد کی فراہمی سے متعلق اقتصادی امور ڈویژن کو چین کے سفیر کی کراچی سے واپسی پر باضابطہ آگاہ کیا جائے گا ۔چین کے سفیر نونگ رونگ نے چین کی قیادت کے فیصلے سے حکومت پاکستان کو آگاہ کر دیا۔
