اسلام آباد (این این آئی)وزیر خارجہ بلاول بھٹو زرداری نے متحدہ عرب امارات کے وزیر خارجہ شیخ عبداللہ بن النہیان سے ملاقات کی جس میں دوطرفہ تعلقات سمیت مختلف امورپر تبادلہ خیال کیا گیا ۔ ترجمان دفتر خارجہ کے مطابق ملاقات ابوظہبی میں سالانہ سر بنی یاس فورم کے سائیڈ لائن میں ہوئی۔ ترجمان کے مطابق وزیر خارجہ نے سیلاب متاثرین کی امداد میں خصوصی امداد پر اماراتی ہم منصب اور یو اے ای حکومت کا شکریہ ادا کیا،یو اے ای نے مشکل وقت میں سب سے زیادہ پاکستان کی مدد کی۔ ترجمان کے مطابق دونوں وزراء خارجہ نے باہمی تعاون بالخصوص تجارت سرمایہ کاری اور توانائی کے شعبوں میں تعاون کے فروغ پر اتفاق کیا۔ ترجمان کے مطابق دونوں وزراء خارجہ نے عالمی و علاقائی امن و سلامتی پر تبادلہ خیال کیا۔
