اسلام آباد (این این آئی)پاکستان مسلم لیگ (ن) کی ترجمان مریم اورنگزیب نے چیئرمین پی ٹی آئی کا انتخاب ”سلیکشن” قرار دیتے ہوئے کہاہے کہ پی ٹی آئی میں ایک بار پھر” سلیکشن” کا عمل صرف پندرہ منٹ میں مکمل ہوگیا ۔ اپنے بیان میں انہوںنے کہاکہ پریس ریلیز ڈیڑھ گھنٹے تک روک کر عوام، الیکشن کمیشن اور اپنے پارٹی ورکرز کی آنکھوں میں ”مٹی ڈالنے” کی کوشش کی گئی۔ مریم اور نگزیب نے کہاکہ نامعلوم اور خفیہ مقام پر یہ کیسا الیکشن تھا جس کا نہ کوئی تجویز کنندہ تھا نہ تائید کنندہ،نہ ووٹرز تھے نہ ووٹر لسٹ، نہ پرائیذائیڈنگ افسر تھا نہ الیکشن پراسیس؟۔ انہوںنے کہاکہ بانی راہنمائوں اور کارکنوں کے خوف سے انہیں الیکشن پراسیس سے ہی باہر کردیاگیا،اسے کہتے ہیں ”دھاندلا”، اسے کہتے ہیں ”آمریت”، اسے کہتے ہیں ”سلیکشن”۔Rigged,Managed, Maniplulated and Dictated Electionsکی تصویر دیکھنی ہوت تو یہ ”سلیکشن” دیکھ لے۔ ۔ انہوںنے کہاکہ یہ جمہوریت ، الیکشن کمیشن اور پارٹی ورکرز سے سنگین مذاق اور انتخابی ضابطوں کی کھلی خلاف ورزی ہے۔ مریم اور نگزیب نے کہاکہ پارٹی میں بانی رہنمائوں اور کارکنوں کو” لیول پلیئنگ فیلڈ ” نہ دینے والے ملک میں ”لیول پلئینگ فیلڈ ” کے مطالبوں کے ڈرامے کررہے ہیں۔ انہوںنے کہاکہ آر ٹی ایس بٹھا کر اقتدار میں آنے والوں کی عادت نہیں بدلی،اپنے اعمال اور کرتوت تو ٹھیک کرنے نہیں،اب الیکشن کمیشن اور چیف الیکشن کمشنر کو دھمکیاں اور گالیاں دیں گے، الزام لگائیں گے، روئیں گئے، پیٹیں گے۔ مریم اورنگزیب نے کہاکہ مقبولیت کا عالم یہ ہے کہ اپنے پارٹی ورکرز کا سامنا کرنے کی بھی ہمت نہیں، عوام کا سامنا کیسے کریں گے ؟ ،جو کچھ ہوا ، جو کچھ ہورہا ہے اور جو کچھ ہوگا، اس سب کا ذمہ دار 9 مئی کا منصوبہ ساز خود ہے۔
