اسلام آباد (این این آئی) پاکستان پیپلز پارٹی کی رہنما شازیہ مری نے کہا ہے کہ حکومت سینٹ الیکشن میں شکست کے بعد دماغی توازن بھی کھو بیٹھی ہے۔ اپنے بیان میں شازیہ مری نے کہاکہ سینیٹ میں اپوزیشن جماعتوں کی واضح اکثریت ہے، شبلی فراز نے سینیٹ چیئرمین کا الیکشن کچھ بھی کر کے جیتنے کی بات کی۔انہوںنے کہاکہ حکومت اب چیئرمین سینیٹ کے الیکشن کو سیکریٹ رکھنے کی وکالت کر رہی ہے، ہم نے تو پہلے ہی کہا تھا کہ حکومت کو اپنے ہی اراکین پر اعتماد نہیں، سینیٹ کے بعد سید یوسف رضا گیلانی کی بطور سینیٹ چیئرمین کامیابی بھی عوام کی جیت ہوگی۔ انہوںنے کہاکہ عوام اس نااہل اور نالائق سلیکٹڈ ٹولے سے تنگ آچکے ہیں، روز ٹی وی پر ڈھٹائی سے مہنگائی اور بیروزگاری میں ریکارڈ اضافے کا دفاع کرنے والوں کو عوام ریجیکٹ کرتے ہیں۔
