اسلام آباد (این این آئی)پاکستان مسلم لیگ (ن) کی ترجمان مریم اورنگزیب نے وزیراعظم عمران خان کے ریپ کے موضوع پر بیان کی مذمت، بیان پر قوم سے معافی مانگنے کا مطالبہ کرتے ہوئے کہا ہے کہ عمران صاحب سے نہ معیشت چلتی ہے، نہ غریبوں کو روزگار ملتا ہے، مہنگائی ختم ہوتی ہے نہ حکومت چلتی ہے، بس زبان ہے وہ بھی ٹھیک نہیں چلتی ہے ۔ اپنے بیان میں انہوںنے کہاکہ ہمیشہ جہالت اور بداخلاقی کا پرچار کرتی ہے ۔ انہوںنے کہاکہ عمران صاحب کا بیان افسوسناک اور شرمناک ہے ،عمران صاحب معصوم بچوں کا فحاشی کی وجہ سے ریپ ہورہا ہے؟،یہ بیان دے کر عمران صاحب نے معصوم ریپ وکٹمز اور ان کے گھر والوں کا دل دکھایا ہے ۔ انہوںنے کہاکہ عمران صاحب کے بیان پر ہر پڑھا لکھا اور باشعور فرد حیران، پریشان اور فکرمند ہے ، عمران صاحب کا بیان ان کی سوچ ، ناقص علمی اور دماغی خلل کا ثبوت ہے،ان کے بیان سے ظاہر ہوگیا کہ وہ اس معاملے میں بھی مکمل نابلد، عمومی جاہلانہ مردانہ سوچ کے مالک ہیں ۔ انہوںنے کہاکہ عمران صاحب نے سطحی ذہنیت پر مبنی بیان دیا ،عمران صاحب آپ کے اوٹ پٹانگ اور کھوکھلے فلسفوں سے اس مجرمانہ ذہنیت کی حوصلہ افزائی ہو رہی ہے جو صرف درندگی ہے ۔ انہوںنے کہاکہ وزیراعظم کے منصب پر بیٹھے شخص کی اپنی سوچ اور علمیت کا یہ عالم ہو تو وہاں سماج کا جنگل بننا یقینی ہے۔
