اسلام آباد (این این آئی) پاکستان اور ہنگری نے زراعت، خوراک، ماحولیات، آبی وسائل، انجینئرنگ، ووکیشنل ٹریننگ اور اربن پلاننگ سمیت مختلف باہمی دلچسپی کے شعبہ جات میں دو طرفہ تعاون کے فروغ پر اتفاق کیا ہے جبکہ وزیر خارجہ شا ہ محمود قریشی نے ہنگری کے وزیر خارجہ پیٹر سجارتو کو مقبوضہ جموں و کشمیر میں جاری انسانی حقوق کی سنگین خلاف ورزیوں اور علاقائی امن کو درپیش خطرات سے آگاہ کرتے ہوئے کہا ہے کہ پاکستان ،افغان امن عمل سمیت ،خطے میں امن و استحکام کیلئے اپنی مصالحانہ کوششیں بروئے کار لا رہا ہے ،پاکستان، 220 ملین آبادی پر مشتمل ایک ابھرتی ہوئی مارکیٹ ہے جہاں سرمایہ کاری کے وسیع مواقع موجود ہیں ،ہماری حکومت سرمایہ کاروں کو ٹیکس میں چھوٹ سمیت بہت سی پرکشش مراعات دے رہی ہے ۔ جمعہ کو پاکستان کے دورے پر آئے ہوئے ہنگری کے وزیر خارجہ و تجارت پیٹر سجارتو کو شاہ محمود قریشی نے وزارت خارجہ آمد پر خوش آمدید کہا جس کے بعد مہمان وزیر خارجہ نے وزارتِ خارجہ میں وزیر خارجہ مخدوم شاہ محمود قریشی سے ملاقات کی جس میں دو طرفہ تعلقات ،مختلف شعبہ جات بالخصوص تجارتی و اقتصادی تعاون کے فروغ سمیت باہمی دلچسپی کے امور پر تبادلہ خیال کیا گیا ۔ شاہ محمود قریشی نے کہاکہ کرونا وبا کے دوران میری دعوت پر، آپ کی، ممتاز کاروباری شخصیات پر مشتمل وفد کے ہمراہ آمد انتہائی مسرت کا باعث ہے ۔انہوںنے کہاکہ ہنگری یورپ کے اہم ممالک میں شامل ہے ،پاکستان، ہنگری کے ساتھ دو طرفہ تعلقات کو خصوصی اہمیت دیتا ہے ۔وزیر خارجہ نے ہنگری کے وزیر خارجہ پیٹر سجارتو کو مقبوضہ جموں و کشمیر میں جاری انسانی حقوق کی سنگین خلاف ورزیوں اور علاقائی امن کو درپیش خطرات سے آگاہ کیا۔ انہوںنے کہاکہ پاکستان ،افغان امن عمل سمیت ،خطے میں امن و استحکام کیلئے اپنی مصالحانہ کوششیں بروئے کار لا رہا ہے
