واشنگٹن (این این آئی)امریکی محکمہ دفاع پینٹاگون نے کہاہے کہ صدر بائیڈن یہ واضح کرتے آئے ہیں کہ وہ امریکی افواج کی حفاظت کے لیے اقدامات کریں گے،اس سلسلے میں امریکہ نے عراق اور شام میں ایران کی حمایت یافتہ ملیشیا کے خلاف فضائی حملے کیے ۔ شام میں امریکی جنگی طیاروں کے حملے میں ملیشیا کے پانچ جنگجو ہلاک اور متعدد زخمی ہو گئے،میڈیارپورٹس کے مطابق ایک بیان میں کہا گیا کہ امریکی فوج پر اس ملیشیا کے ڈرون حملوں کے جواب میں آپریشنل اور ہتھیار ذخیرہ کرنے والی سہولیات کو نشانہ بنایا گیا ہے۔پینٹاگون کے بیان کے مطابق ان فضائی حملوں کے دوران شام میں دو اور عراق میں ایک ہدف کو نشانہ بنایا گیا۔ بیان میں کہا گیا کہ یہ سہولیات ایران کے حمایت یافتہ ملیشیا گروہ بشمول کاتب حزب اللہ اور کاتب سید الشہدا استعمال کرتے تھے۔بیان میں کہا گیا کہ امریکہ نے یہ حملے اپنے دفاع میں کیے ہیں اور ضروری، مناسب اور جان بوجھ کر کی گئی اس کارروائی کا مقصد اضافی خطرے کو محدود کرنے کے علاوہ ایک واضح اور غیر جانبدار پیغام بھیجنا بھی تھا۔پینٹاگون نے یہ نہیں بتایا کہ ان حملوں میں کوئی ہلاک یا زخمی ہوا ہے یا نہیں۔ لیکن خبر رساں ادارے کے مطابق برطانیہ میں مقیم مانیٹرنگ گروپ سیریئن آبزرویٹری فار ہیومن رائٹس کا کہنا تھاکہ شام میں امریکی جنگی طیاروں کے حملے میں ملیشیا کے پانچ جنگجو ہلاک اور متعدد زخمی ہو گئے ۔شام کے سرکاری خبر رساں ادارے کی رپورٹ کے مطابق اس حملے میں ایک بچے کی ہلاکت ہوئی ہے جبکہ کم از کم تین دیگر افراد زخمی ہوئے ۔
