اسلام آباد (این این آئی)وفاقی وزیر ہوا بازی غلام سرور خان نے کہا ہے کہ کورونا کے باعث پوری دنیا کی ایوی ایشن انڈسٹری مشکلات کا شکار ہے،خصوصی پروازوں کے ذریعے پھنسے مسافروں کو وطن واپس لایا جائے گا،این سی او سی کے ساتھ مشاورت کے بعد پروازوں کو بڑھا 50 فیصد کیا جارہا ہے۔ بدھ کو سینیٹ میں ائیر لائنز کی اضافی بکنگ اور منسوخی کی وجہ سے پاکستانیوں کو درپیش مشکلات پر توجہ دلاؤ نوٹس سینیٹر نذہت صادق نے پیش کیا اور کہاکہ پروازوں کی منسوخی کے باعث پاکستانی مشکلات کا شکار ہیں،کیا مسافروں کو ٹریول ایڈوائزری سے اگاہ کیا،ملائیشیا میں تین ہزار سے زائد پاکستانی پھنسے ہوئے ہیں۔ وفاقی وزیر غلام سرور نے جواب دیتے ہوئے کہا کہ کورونا کے باعث پوری دنیا کی ایوی ایشن انڈسٹری مشکلات کا شکار ہے،این سی او سی کورونا کی صورتحال کے مطابق فیصلے کرتی ہے،مئی میں ان بائونڈ فلائٹس کم کرنے کا فیصلہ کیا گیا،انٹرنیشنل ائیرلائنز کی اووربکنگ کے باعث مشکلات ہوئیں،سول ایوی ایویشن نے کمپنیوں کو شوکاز نوٹس کیے ہیں۔ انہوںنے کہاکہ خصوصی پروازوں کے ذریعے پھنسے مسافروں کو وطن واپس لایا جائے گا،این سی او سی کے ساتھ مشاورت کے بعد پروازوں کو بڑھا 50 فیصد کیا جارہا ہے،اس حوالے سے نوٹیفکیشن جاری کردیا جائے گا۔ انہوںنے کہاکہ سعودی عرب میں بند 85 پاکستانی قیدیوں کو پاکستان لایا جائیگا۔
