اسلام آباد (این این آئی)صدر مملکت ڈاکٹر عارف علوی سے چیلا رام کیولانی کی قیادت میں قومی اقلیتی کمیشن کے وفد نے ملاقات کی جس میں مختلف امور پر گفتگو کی گئی ۔ صدر مملکت نے کہاکہ حکومت اقلیتوں کی سماجی و معاشی ترقی کیلئے اقدامات کر رہی ہے، حکومت اقلیتوں کی عبادت گاہوں کی حفاظت اور دیکھ بھال کیلئے بھرپور کاوشیں کررہی ہے۔ انہوںنے کہاکہ حکومت نے اقلیتوں کیلئے سرکاری نوکریوں میں 5 فیصد کوٹہ مختص کیا ، اقلیتوں کو تعلیم اور سرکاری نوکریوں کے حصول کیلئے حوصلہ افزائی کی ضرورت ہے۔اقلیتی رہنماء اپنی کمیونٹی میں نوجوانوں کو تعلیم اور سرکاری نوکریاں حاصل کرنے پر راغب کریں، آئین پاکستان اقلیتوں کو برابری کے حقوق فراہم کرتا ہے۔ انہوںنے کہاکہ ریاست اقلیتوں کو قومی دھارے میں شامل کرنے کیلئے پر عزم ہے، ملکی ترقی کیلئے ایک جامع اور مساوات پر مبنی معاشرے کی تشکیل ناگزیر ہے۔ انہوںنے کہاکہ حکومت اقلیتی برادری کے طلباء کو تعلیمی وظائف اور مالی امداد فراہم کررہی ہے، کامیاب جوان پروگرام کے تحت اقلیتی برادری کے نوجوان اور خواتین کاروبار کیلئے قرض حاصل کر سکتے ہیں۔ انہوںنے کہاکہ بین المذاہب ہم آہنگی کے فروغ کیلئے مکالمے کی روایت عام کرنا ہوگی ، امید ہے کہ قومی اقلیتی کمیشن بین المذاہب ہم آہنگی اور امن کے فروغ کیلئے اپنا کردار ادا کرتا رہے گا۔وفد نے صدر مملکت کو اقلیتوں کو درپیش مسائل سے آگاہ کیا، صدر مملکت نے وفد کو مسائل کے حل کیلئے کردار ادا کرنے کی یقین دہانی کرائی ،وفد نے اقلیتوں کے حقوق کے تحفظ کیلئے کاوشوں اور ذاتی دلچسپی پر صدر مملکت کے کردار کی تعریف کی۔
