لاہور( این این آئی)پاکستان مسلم لیگ (ن)کے صدر شہبازشریف نے بابائے قوم قائداعظم محمد علی جناح کی 73 ویں برسی پر خراج عقیدت پیش کرتے ہوئے کہا ہے کہ ایمان، اصول، قانون، جمہوریت، نظم وضبط اور اپنے عہد پراٹل رہنا قائداعظم محمد علی جناب کی شخصیت کے بنیادی جوہر تھے ،پوری قوم اپنے عظیم محسن کے درجات کی بلندی کے لئے اللہ پاک کے حضور دعاگو ہے ۔ اپنے بیان میں انہوں نے کہا کہ افسوس قائداعظم کو قیام پاکستا ن کے بعدزندگی نے مہلت نہ دی ورنہ پاکستان کوآج بہت سارے مسائل کا سامنا نہ ہوتا ،ہمیں بحیثیت قوم قائداعظم کے افکار سے رہنمائی لیتے ہوئے پاکستان کوجدیداسلامی فلاحی ریاست بنانے کے لئے دن رات محنت کو شعار بنانا ہوگا ،قائداعظم کے آئین، جمہوریت، یقین،اتحاد اور تنظیم کے سنہری راستے پر چلتے ہوئے ہم کامیابی منزل حاصل کرسکتے ہیں ،آئیے اس دن کی مناسبت سے ہم عہد کریں کہ پاکستان کو قائداعظم اور علامہ اقبال کے نظریات کی عملی تعبیر سے ہمکنار کرکے دم لیں گے ۔انہوں نے کہاکہ محمد نوازشریف کی قیادت میں پاکستان مسلم لیگ (ن)قائداعظم اور علامہ اقبال کی بصیرت کی روشنی میں پاکستان کو تعمیر، ترقی، خوشحالی اور عظمت کی منزل سے ہمکنار کرے گی۔
