پشاور (این این آئی)پڑوسی ملک بھارت سے ہندو یاتریوں کا پہلا 13 رکنی وفد غیر ملکی پرواز کے ذریعے پشاور پہنچ گیا۔پاکستان ہندو کونسل کے سرپرستِ اعلیٰ اور پاکستان تحریکِ انصاف کے رکنِ قومی اسمبلی ڈاکٹر رمیش کمار کے مطابق پشاور آنے والا ہندو یاتریوں کا یہ وفد کرک پہنچا ۔انہوں نے بتایا کہ یہ ہندو یاتری اپنی مذہبی رسومات ادا کریں گے، پاکستانی حکومت کی جانب سے یاتریوں کو مکمل تعاون فراہم کیا جا رہا ہے۔ڈاکٹر رمیش کمار نے بتایا کہ بھارت سے کْل 200 ہندو یاتری پاکستان پہنچیں گے، ہندو یاتریوں کا دوسرا 113 رکنی وفد بھی پشاور پہنچا۔انہوںنے کہاکہ ہندو یاتریوں کی پاکستان آمد سے مذہبی سیاحت کو فروغ ملے گا، یہ یاتری یکم تا 4 جنوری پاکستان کا دورہ کریں گے۔پیٹرن انچیف پاکستان ہندو کونسل نے مزید بتایا کہ پاکستان سے بھی ہر ماہ 1 وفد بھارت روانہ ہو گا۔انہوں نے بتایا کہ پاکستانی وفد حضرت خواجہ نظام الدین اولیا اور خواجہ غریب نواز کی درگاہ کی زیارت کریگا۔
