اسلام آباد (این این آئی)پاکستان میں تعینات مصری سفیر طارق دہروگ نے وزارتِ خارجہ میں وزیر خارجہ مخدوم شاہ محمود سے ملاقات کی جس میں دونوں ممالک کے درمیان دوطرفہ تعلقات کے فروغ پرگفتگو کی گئی۔ وزیر خارجہ شاہ محمود قریشی نے کہاکہ مصر خطے کا ایک اہم ملک ہے اور اس کا استحکام اور ترقی خطے میں امن اور خوشحالی کے لیے ناگزیر ہے۔مخدوم شاہ محمود قریشی نے کہاکہ یہ امر قابل مسرت ہے کہ مصر، صدر عبدالفتاح السیسی کی قابل قیادت میں سیاسی استحکام اور سلامتی کی جانب گامزن ہے۔ شاہ محمود قریشی نے کہاکہ ہمارے دونوں ممالک کے عوام مشترکہ عقیدے،یکساں ثقافتی وابستگی کے بندھن سے بندھے ہوئے ہیں۔وزیر خارجہ نے کہاکہ دونوں برادر ممالک کے درمیان علاقائی اور بین الاقوامی امور پر نقطہ نظر میں یکسانیت خوش آئند ہے۔ شاہ محمود قریشی نے کہاکہ میری گذشتہ سال دورہ مصر کے دوران، صدر السیسی اور وزیر خارجہ سامع شکری کے ساتھ بہت سود مند ملاقاتیں ہوئیں۔ شاہ محمود قریشی نے کہاکہ پاکستان مصری وزیر خارجہ سامع حسن شکری کے دورہ پاکستان اور اسلام آباد میں چوتھے مشترکہ وزارتی کمیشن (جے ایم سی) کے جلد انعقاد کا منتظر ہے۔مصری سفیر نے وزیر خارجہ کا شکریہ ادا کرتے ہوئے، پاکستان اور مصر کے مابین دو طرفہ تعلقات کے فروغ کیلئے اپنے ہر ممکن تعاون کا یقین دلایا۔
