اسلام آباد (این این آئی) پی ڈی ایم کے ترجمان اور جے یو آئی کے مرکزی رہنماء حافظ حمد اللہ نے عمران خان کی جانب سے مولانا فضل الرحمان پر تنقید پر ردعمل کا اظہار کرتے ہوئے کہا ہے کہ مولانا فضل الرحمان کی جماعت، خدمت اور قربانیوں کی سوسالہ تاریخ رکھتی ہے۔ توشہ خانہ چور تنقید کرنے سے پہلے ہزار بار سوچیں۔ اپنے بیان میں حافظ حمد اللہ نے کہاکہ عمران نیازی جلسوں میں اپنی کارکردگی بتائیں یا ریحام خان، عائشہ گلالئی اور علیم خان کے الزامات کا جواب دیں۔انہوںنے کہاکہ جے یوآئی وزارتوں کو اصلاح اور عوامی خدمت کیلئے قبول کرچکی ہے، نیازی نے کرپشن کیلئے” گوگی ازم”کا فلسفہ متعارف کروایا۔ حافظ حمد اللہ نے کہاکہ عمران خان کی چیخیں بتارہی ہیں کہ اقتدار کے نشے کا زخم کتنا گہرا ہے،محکمہ مواصلات میں زیادہ پیسوں کا ذکر کرکے عمران خان دل کا ارمان زبان پر لے آیا۔انہوںنے کہاکہ حواس باختگی سے دوقدم آگے باؤلے پن کا شکار نیازی کل تک جن اداروں کی تعریفیں کرتا تھا آج ان کو گالیاں دے رہا ہے۔
