نیویارک(این این آئی)پاکستان نے اقتصادی بحران سے نمٹنے کے لیے کثیر الجہتی ترقیاتی بینکوں کی طرف سے جاری کئے جانے والے قرضوں کے حجم میں اضافے کا مطالبہ کیا ہے۔اقوام متحدہ میں پاکستان کے مستقل مندوب منیر اکرم نے اقوام متحدہ کی جنرل اسمبلی کی دوسری کمیٹی (اقتصادی اور مالیاتی) کے اجلاس میں اظہار خیال کرتے ہوئے کہا کہ جغرافیائی سیاسی کشیدگی اور نئی تحفظ پسندی تجارتی نیٹ ورکس کو پارہ پارہ اور عالمی معیشت کو درہم برہم کر رہی ہے، دنیا کے ساٹھ ممالک قرض کے بوجھ تلے دبے ہوئے ہیں، ماحولیاتی تبدیلیوں کے منفی اثرات بڑھ رہے ہیں اور ڈیجیٹل تقسیم ایک نئی ترقیاتی تقسیم بن سکتی ہے ،اس صورتحال سے نمٹنے کے لیے ایک منصوبہ بندی کے تحت کثیرالجہتی ترقیاتی بینک قرضوں کے حجم ، معیار اور رسائی میں اضافے کی ضرورت ہے۔ پاکستانی مندوب نے بڑے پیمانے پر ترقیاتی بحران،قحط، غربت اور عدم مساوات کو اجاگر کرتے ہوئے کہا کہ بین الاقوامی برادری کی کوشش یہ ہونی چاہیے کہ وہ ترقی کے لیے ایکشن پلان پر معاہدے کے لئے سیاسی عزم کو مجتمع کرے جسے ا?ئندہ سال جولائی میں سپین میں ہونے والی چوتھی بین الاقوامی کانفرنس برائے فنانسنگ فار ڈویلپمنٹ (FfDـIV) میں اپنایا جا سکتا ہے
