اسلام آباد (این این آئی)وزیراعظم شہباز شریف سے وی آن (VEON) گروپ کے چیئرمین آوگی کے فیبیلا کی قیادت میں 5 رکنی وفد نے ملاقات کی جس میں مختلف امور پر تبادلہ خیال کیا گیا ۔ اس موقع پر وزیر اعظم نے کہاکہ حکومت ٹیلی کمیونیکیشن کے شعبے کی ترقی و ترویج کے لیے کوشاں ہے ۔ شہبازشریف نے کہاکہ آئندہ تین سالوں میں پاکستان سے آئی ٹی کی برآمدات کو 25 بلین ڈالر تک پہنچانے کے ہدف کے حصول کیلئے پر عزم ہیں۔ وزیر اعظم نے کہاکہ دور دراز علاقوں میں بھی تیز تر موبائل انٹرنیٹ کی فراہمی کے لئے اقدامات کئے جا رہے ہیں۔ شہبازشریف نے کہاکہ پاکستان میں تیز تر اور قابل اعتماد انٹر نیٹ سروسز کے لئے 5G انٹرنیٹ کی سروسز متعارف کرانے کیلئے اقدامات اٹھائے جا رہے ہیں ،5 جی سروسز کی بدولت ڈیجیٹل پاکستان کے ویڑن کا حصول ممکن ہو سکے گا ۔ شہبازشریف نے کہاکہ پاکستان میں کیش لیس اور ڈیجیٹل معیشت کے فروغ کے حوالے سے ٹیلی کام سیکٹر کا کردار انتہائی اہمیت کا حامل ہے ۔ انہوںنے کہاکہ وی آن کی سبسیڈئری JAAZ گروپ پاکستان میں ٹیلی کمیونی کیشن اور فنانشل ٹیکنالوجی کے شعبے میں اہم کردار کر رہا ہے ۔ انہوںنے کہاکہ پاکستان میں انفارمیشن ٹیکنالوجی ، ڈیجیٹائز یشن اور مصنوعی ذہانت کے فروغ کے حوالیسے وی آن گروپ کے ساتھ مل کر کام کرنے کے خواہاں ہیں ۔وفد نے ملک میں حالیہ معاشی استحکام کے حوالے سے حکومتی کوششوں کی تعریف کی اور کہاکہ پاکستان آئی ٹی و ٹیلی کام کے شعبے میں سرمایہ کاری کے حوالے سے ایک اہم ملک بن چکا ہے ۔ملاقات میں وزیر مملکت برائے انفارمیشن ٹیکنالوجی و ٹیلی کام شزا فاطمہ ، وزیرمملکت برائے خزانہ و محصولات علی پرویز ملک ،وزیر اعظم کے کوآرڈینیٹر رانا احسان افضل اور متعلقہ اعلیٰ سرکاری افسران بھی موجود تھے۔
