سانگلہ ہل( این این آئی) مسلم لیگ (ن) کے نائب صدر ، سابق گورنر وفاقی وزیر چوہدری محمد برجیس طاہر نے کہا ہے کہ قائد محترم میاں نواز شریف کے ویژن پر عمل درآمد معیشت کی مضبوطی کا ضامن ہے ،نواز شریف اور مریم نواز شریف کی قیادت میں پارٹی متحد ہے ،پراپیگنڈا کرنے والوں کو منہ کی کھانا پڑے گی۔وہ سانگلہ ہل شاہکوٹ اور حلقہ بھر سے آنے والے ورکروں کارکنوں اور مقامی صحافیوں سے گفتگو کر رہے تھے۔چوہدری برجیس طاہر نے کہا کہ پارٹی سمندر ہوتی ہے لوگ آتے جاتے رہتے ہیں پارٹی سے پیار کرنے والے پارٹی کو چھرا نہیں مارتے بلکہ قربانیاں دیتے ہیں اس کے برعکس پارٹیاں بدلنے والے سب ایک مقام پر اکٹھے ہو جاتے ہیں۔انہوں نے کہا کہ کارکن میرا قیمتی سرمایہ ہیں ، 1985ء سے کارکنوں نے چھ مرتبہ ایم این اے بنایا میرے کارکن میرے ماتھے کا جھومر ہیں ،میری سیاست کا محور کارکنوں کی عزت و احترام ہے۔ایک سوال کے جواب پر برجیس طاہر نے کہا کہ سیاست میں ادب اور احترام کو ملحوظ خاطر رکھنا ضروری ہوتا ہے مگر یہاں گالم گلوچ اور طوفان بدتمیزی کی سیاست کا رواج لانے والے دراصل تحریک انصاف میں جانے اور انٹرویو دینے کی ریہرسل کر رہے ہیں ،اپنے کارکنوں کی عظمت کو سلام پیش کرتا ہوں جنہوں نے گالی کی سیاست کونظراندازکرکے میرا ساتھ دیا اور ہر موقع پر میرا سر فخر سے بلند کیا۔
