سکھر(این این آئی) سابق قائدحزب اختلاف وزیرپیپلزپارٹی کے سینئررہنما سیدخورشیداحمد شاہ نے کہاہے کہ 24 نومبر کے احتجاج پراعتراض نہیں اگر وہ پر تشدد ہوا تو ذمہ داری پی ٹی آئی کی ہوگی۔خصوصی گفتگوکرتے ہوئے سید خورشیدشاہ نے کہا کہ یہ طے شدہ بات ہے کہ جوڈیشل کمیشن میں 2ہمارے اور2ان کے ممبرہوں گے۔انہوں نے کہاکہ حیدرآباد موٹر وے آج کا ایشو نہیں، 1988 میں نوازشریف سے مشورہ ہوا موٹر وے بنائیں، ہماری کوشش تھی کہ موٹر وے سندھ سے شروع ہو کیونکہ سمندر سندھ میں ہے، ہمارے 2 حب ہیں گوادراورکراچی مگر افسوس دونوں صوبوں میں موٹروے نہیں بنا۔انہوں نے کہاکہ 34 سال کے عرصے میں موٹر وے اپنا خرچہ نکال کر منافع میں چل رہے ہوتے، موٹر وے ملکی معیشت کی ریڑھ کی ہڈی ہوتے ہیں لیکن سندھ والوں کی بدبختی ہے کہ سندھ سے موٹروے شروع نہیں ہوئی۔پیپلزپارٹی رہنما نے کہاکہ میں نے وفاقی حکومت سے بات کی ہے کہ سندھ میں موٹروے پرجلدکام شروع کرے، ہم سیاسی طور پر مخالف تھے کہ ملک کا وزیر اعظم جیل میں ہو۔پی ٹی آئی کے احتجاج کے حوالے سے سوال پر انہوں نے کہاکہ 24 نومبر کے احتجاج پر اعتراض نہیں اگر وہ پر تشدد ہوا تو ذمہ داری پی ٹی آئی کی ہوگی۔
