اسلام آباد (این این آئی)نائب صدر پیپلز پارٹی سینیٹر شیری رحمان نے کرم میں مرکزی شاہراہ کی تاحال بندش پر گہری تشویش کا اظہار کرتے ہوئے کہا ہے کہ ادویات کی عدم فراہمی کے سبب پچاس بچوں کا جاں بحق ہونا انتہائی افسوسناک ہے۔ اپنے بیان میں انہوںنے کہاکہ ضلع کرم میں پشاور پاراچنار مرکزی شاہراہ سمیت آمدورفت کے راستوں کی بندش کو 75 روز گزر گئے ۔ انہوںنے کہاکہ شہر میں اشیائے خوردونوش، ادویات، تیل، لکڑی، ایل پی جی کی شدید قلت ہوگئی،ادویات کی عدم فراہمی کے سبب پچاس بچوں کا جاں بحق ہونا انتہائی افسوسناک ہے ۔ انہوںنے کہاکہ مرکزی شاہراہ اور افغان بارڈر سمیت راستوں کی بندش سے شہری بحرانی کیفیت سے دوچار ہیں۔ انہوںنے کہاکہ فریقین سے مطالبہ کرتی ہوں کہ صلح کی طرف قدم بڑھا کر شہریوں کی مشکلات آسان کریں۔ انہوںنے کہاکہ وفاقی حکومت ،صوبائی حکومت اور تمام سٹیک ہولڈرز سے معاملے کو ہنگامی بنیادوں پر حل کرنے کی درخواست کرتی ہوں تا کہ مزید جانی نقصان سے بچا جا سکے۔
