اسلام آباد(این این آئی) مسلم لیگ ن کے رہنما اور پی ٹی آئی سے مذاکرات کرنیوالی کمیٹی کے ترجمان عرفان صدیقی نے کہا ہے کہ اگر تحریک انصاف میں راستے بند کرنے کے بجائے کھولنے کی سوچ پیدا ہو رہی ہے تو یہ اچھی بات ہے۔نجی ٹی وی کے پروگرام میں بات کرتے ہوئے سینیٹر عرفان صدیقی نے کہاکہ پی ٹی آئی جو مطالبات لائی ہے وہ بڑے مطالبات ہیں، یہ مطالبات ایسے نہیں کہ ہم فوری اس پر ردعمل دیں، جہاں کہیں گنجائش نکلے گی ضرور نکالیں گے۔رہنما مسلم لیگ ن نے کہا کہ پی ٹی آئی کو ہماری حدود کا علم ہے، انہیں پتا ہے کہ حکومت قیدیوں کو کتنی رعایت دے سکتی ہے۔ سینیٹر عرفان صدیقی کا کہنا تھا اگر تحریک انصاف میں راستے بند کرنے کے بجائے راستے کھولنے کی سوچ پیدا ہو رہی ہیتو یہ اچھی بات ہے، اسٹیبلشمنٹ کے حوالے سے بھی اْن کے دل میں نرم گوشہ پیدا ہو رہا ہے جو بہت اچھی پیشرفت ہے۔واضح رہے کہ حکومت اور پاکستان تحریک انصاف کے درمیان گزشتہ ماہ مذاکرات کا باقاعدہ آغاز ہوا تھا جبکہ مذاکرات کا دوسرا دور آج ہو گا جس میں پی ٹی آئی اپنے مطالبات حکومت کے سامنے رکھے گی۔
