لندن(این این آئی)پاکستانی نوجوان کرکٹر صائم ایوب نے پاکستان کرکٹ بورڈ (پی سی بی ) کے اقدامات پر اطمینان کا اظہار کیا ہے۔ لندن میں نجی ٹی وی سے گفتگو میں صائم ایوب نے کہا کہ فی الحال میں چیمپئنز ٹرافی کھیلنے یا نہ کھیلنے سے حوالے سے کچھ بھی نہیں کہہ سکتا ہوں۔ لندن میں زیر علاج نوجوان کھلاڑی نے کہا کہ میڈیکل پینل کے فیصلے کا انتظار ہے، وہ پی سی بی کی جانب سے کیے گئے اقدامات سے مطمئن ہیں۔دو روز قبل صائم ایوب کا پہلا میڈیکل چیک اپ مکمل کرلیا گیا، ٹخنوں کے مسائل کے ماہر ڈاکٹر لکی جیاسیلن نے اْن کا معائنہ کیا۔نوجوان کرکٹر جنوبی افریقا کے خلاف کیپ ٹاؤن ٹیسٹ کے دوران انجری کا شکار ہوئیتھے، ابتدائی رپورٹس میں بتایا گیا کہ اْنہیں ٹخنے میں فریکچر ہے۔پی سی بی نے صائم ایوب کو بہترین علاج کیلیے لندن بھجوانے کا فیصلہ کیا، برطانوی ڈاکٹرز کی رپورٹس اور مشورے کی بنیاد پر صائم ایوب کا مزید علاج کیا جائے گا۔دوسری طرف قومی کرکٹر سلمان علی آغا نے کہا کہ صائم ایوب کی رپورٹس کے مطابق وہ چیمپئنز ٹرافی سے قبل ٹھیک ہوجائیں گے۔
