واشنگٹن (این این آئی)سفیر پاکستان مسعود خان نے اقوام متحدہ سے خصوصی ایلچی برائے کشمیر مقرر کرنے کی اپیل کرتے ہوئے کہا ہے کہ بھارت اور پاکستان کے درمیان سفارتی روابط کی عدم موجودگی علاقائی سلامتی کے لیے خطرہ ہیں،اقوام متحدہ اور سلامتی کونسل کے مستقل ارکان جموں و کشمیر کی ابتر صورتحال کا فوری نوٹس لیں۔وہ سفارت خانہ پاکستان واشنگٹن کے زیر اہتمام تیسرے یوم استحصال کشمیر کے موقع پر منعقدہ ایک خصوصی تقریب سے خطاب کر رہے تھے۔جارج واشنگٹن یونیورسٹی کے پروفیسر ڈاکٹر امتیاز خان نے اپنے خطاب میں معصوم کشمیریوں کے ساتھ ہونے والے مظالم پر روشنی ڈالی جن میں عصمت دری، قتل، بلاجواز قید و بند، مکانات اور علاقوں کی مسماری اور مذہبی تقریبات کے حوالے سے مسلمانوں پر عائد پابندیاں شامل ہیں۔امتیاز خان نے میڈیا پر زور دیا کہ وہ مسئلہ کشمیر کو اجاگر کرنے میں اپنا کردار ادا کریں۔ورلڈ کشمیر اویئرنس فورم کے سیکرٹری جنرل ڈاکٹر غلام نبی فائی نے جموں و کشمیر میں نسل کشی کے ممکنہ خطرے کے بارے میں ڈاکٹر گریگوری اسٹینٹن کی وارننگ کا حوالہ دیتے ہوئے اقوام متحدہ کے چارٹر اور اقوام متحدہ کی سلامتی کونسل کی متعلقہ قراردادوں کے تحت مسئلے کے فوری حل کی ضرورت پر زور دیا
