لاہور(این این آئی)چیمپئنز ٹرافی کیلئے اعلان کردہ پاکستانی اسکواڈ پر تحفظات کیے جا رہے ہیں تبدیلی سے متعلق چیئرمین پی سی بی کا اہم بیان سامنے آیا ہے۔ سابق کھلاڑی میگا ایونٹ کے لیے اعلان کردہ قومی اسکواڈ کو غیر متوازن قرار دیتے ہوئے اس میں ردوبدل کا بھی مطالبہ کر رہے ہیں۔ ایسے میں چیئرمین پی سی بی محسن نقوی کا اس حوالے سے اہم بیان سامنے آیا ہے۔قذافی اسٹیڈیم میں مزدوروں کے اعزاز میں دیے گئے ظہرانے کے موقع پر صحافیوں سے غیر رسمی گفتگو کرتے ہوئے بتایا کہ سلیکشن کمیٹی چیمپئنز ٹرافی اسکواڈ کو ریویو کر رہی ہے۔محسن نقوی نے کہا کہ آئی سی سی چیمپئنز ٹرافی کے لیے پی سی بی سلیکشن کمیٹی کی مشاورت جاری ہے اور کمیٹی میگا ایونٹ کے اعلان کردہ اسکواڈ کو ریویو کر رہے ہیں۔ان کا کہنا تھا کہ خوشدل شاہ اور فہیم اشرف کو نیک نیتی کے ساتھ اسکواڈ کا حصہ بنایا ہے، تاہم سلیکشن کمیٹی کو چیمپئنز ٹرافی کے اسکواڈ میں تبدیلی کا اختیار ہے۔
