پشاور(این این آئی)مشیرِ اطلاعات خیبر پختون خوا بیرسٹر محمد علی سیف نے کہا ہے کہ وفاقی حکومت دہشتگردی کے خلاف جنگ میں سیاسی بیان بازی سے گریز کرے، وفاقی حکومت نے مدد کے بجائے صوبے کے فنڈز روک رکھے ہیں۔بیرسٹر محمد علی سیف نے اپنے ایک بیان میں کہا کہ دہشت گردی صوبائی نہیں بلکہ قومی مسئلہ ہے، صوبے کو معاشی طور پر کمزور کرنا دہشتگردی کو فروغ دینے کے مترادف ہے۔انہوں نے مزید کہا کہ خیبر پختون خوا پولیس بہادری سے دہشتگردوں کا مقابلہ کر رہی ہے، گزشتہ 3 دنوں میں پولیس نے دہشتگردوں کے متعدد حملے ناکام بنا دیے۔بیرسٹر سیف کا کہنا ہے کہ بنوں اور لکی مروت میں عوام نے پولیس کے شانہ بشانہ دہشتگرد حملوں کو پسپا کیا ہے، خیبر پختون خوا حکومت پولیس اور عوام کو خراجِ تحسین پیش کرتی ہے۔بیرسٹر سیف نے کہا کہ عوام اور پولیس دہشتگردی کے خلاف جنگ میں متحد ہیں، عوام کے تعاون کے بغیر شرپسند عناصر کا خاتمہ ممکن نہیں۔ان کا کہنا ہے کہ این ایف سی ایوارڈ میں اس کے مطابق حصہ نہیں دیا جا رہا، بجلی کے خالص منافع کے 2 ہزار ارب روپے کے بقایاجات بھی ادا نہیں کیے جا رہے۔بیرسٹر محمد علی سیف نے یہ بھی کہا کہ فاٹا انضمام کے بعد خیبر پختون خوا کی آبادی میں اضافہ ہوا ہے۔
