اسلام آباد (این این آئی)چیئرمین سینیٹ محمد صادق سنجرانی سے پاکستان میں چین کے سفیر نونگ رونگ نے پارلیمنٹ ہاوْس میں ملاقات کی جس میں دوطرفہ تعلقات سمیت باہمی دلچسپی کے امور پر تبادلہ خیال کیا گیا ۔پاکستان اور چین نے باہمی مفاد کیلئے مختلف شعبوں میں دوطرفہ تعاون کو مزید فروغ دینے کے عزم کا اعادہ کیا اور دونوں ملکوں نے خطے میں امن ، خوشحالی اور ترقی کے فروغ کے لیے اجتماعی کوششوں کی ضرورت پر زور دیا ۔ چیئر مین سینٹ نے کہاکہ ”اسٹریٹجک تعاون شراکت داری ” پاک – چین تعلقات کو نئی بلندیوں پر لے جائے گی۔ محمد صادق سنجرانی نے کہاکہ دونوں حقیقی دوست ہر طرح کے حالات میں ایک دوسرے کے ساتھ کھڑے رہے۔ انہوںنے کہاکہ پاکستان چین کے قومی مفاد کے بنیادی امور” ون چائنا پالیسی ”، تائیوان ، تبت ، ہانگ کانگ اور بحیرہ جنوبی چین پر چین کی حمایت کرتا ہے۔چیئرمین سینیٹ نے پاکستان کے بنیادی قومی مفاد کے امور، جموں و کشمیر تنازعہ اور ایف اے ٹی ایف پر چین کی حمایت کو سراہا۔ صادق سنجرانی نے کہاکہ پاکستان پاک ـچین اقتصادی راہداری منصوبے کی بروقت تکمیل کے لیے پرعزم ہے۔ انہوںنے کہاکہ پاک ـچین اقتصادی راہدای کے مخالف عناصر کامیاب نہیں ہوں گے، پاکستان میں مختلف منصوبوں پر کام کرنے والے چینی شہریوں کی حفاظت پاکستان کی اولین ترجیح ہے ۔ چیئر مین سینٹ نے کہاکہ حکومت پاکستان میں چینی شہریوں کی حفاظت کیلئے تمام اقدامات کررہی ہے۔ چینی سفیر نے کہاکہ پاکستان چین کا قریبی دوست ہے ، چین دوطرفہ تعاون مزید مستحکم کرنے کا خواہاں ہے، چین کے تجربات پاکستان کی سماجی اور معاشی خوشحالی میں معاون ثابت ہوں گے۔چین نے خودمختاری اور علاقائی سالمیت کے لیے حمایت جاری رکھنے کے عزم کا اعادہ کیا ۔ صادق سنجرانی نے کہاکہ پاکستان کو تائیوان کی صورتحال پر گہری تشویش ہے،تائیوان کا مسئلہ سنگین ہونے کی صورت میں علاقائی امن اور استحکام شدید متاثر ہونے کا خطرہ ہے۔چیئر مین سینٹ نے کہاکہ یوکرین اور دنیا کے دیگر خطوں میں جاری تنازعات کے بعد دنیا ایک اور بحران کی متحمل نہیں ہو سکتی، نیا تنازعہ اگر پیدا ہوتا ہے تو اس کے عالمی امن، سلامتی اور معیشت پر منفی اثرات مرتب ہوں گے۔ چینی سفیر نے کہاکہ چین علاقائی امن کیلئے اپنی جدوجہد جاری رکھے گا۔
