اسلام آباد (این این آئی)میلان،نائب صدر پیپلز پارٹی سینیٹر شیری رحمان نے کہا ہے کہ عالمی جنوب کیلئے وعدہ کردہ ماحولیاتی مالی معاونت تاحال زمین پر نظر نہیں آتی ۔ نیکسٹ میلان فورم کے تحت ایک سیارہ ،پائیدار مستقبل کی تلاش کانفرنس سے خطاب کرتے ہوئے انہوںنے کہاکہ عالمی جنوب کے لیے وعدہ کردہ ماحولیاتی مالی معاونت تاحال زمین پر نظر نہیں آتی ۔ انہوںنے کہاکہ ماحولیاتی مالی امداد کے وعدے بار بار دہرائے جاتے ہیں مگر عملی اقدام نہیں ہوتا۔ شیری رحمن نے کہاکہ ماحولیاتی مالی معاونت طاقت کے توازن کا مسئلہ بن چکی ہے، عالمی انصاف کا تقاضا ہے ۔ سابق وزیر نے کہاکہ ترقی یافتہ ممالک مالی امداد کا وعدہ کرتے ہیں اور بعد میں دستیابی سے انکار کر دیتے ہیں ۔ شیری رحمن نے کہاکہ ماحولیاتی تبدیلی کی کوئی سرحدیں نہیں، مگر سب سے زیادہ بوجھ ترقی پذیر ممالک پر پڑ رہا ہے۔ سابق وزیر نے کہاکہ پاکستان کے جنوبی علاقوں میں اپریل میں درجہ حرارت پچاس ڈگری سے تجاوز کر چکا ہے، ماحولیاتی تبدیلی کی رفتار ان فریم ورکس سے کہیں زیادہ تیز ہو چکی ہے جو اس کا مقابلہ کرتے ہیں ۔ سابق وزیر نے کہاکہ اگر ماحولیاتی مالی خلا کو بند نہ کیا گیا تو ہر عالمی ہدف ناکامی سے دوچار ہو گا۔ انہوںنے کہاکہ ہم باتوں کی کمی کا شکار نہیں، اصل مسئلہ عمل درآمد کی شدید کمی ہے ۔ انہوںنے کہاکہ ماحولیاتی بحران کا حل فوری، منصفانہ اور عملی مالی تعاون کے بغیر ممکن نہیں ۔
