ریاض(این این آئی)سعودی عرب کی وزارت حج وعمرہ نے حجاج کرام کو ہدایت کی ہے کہ وہ نسک کارڈ ہر وقت اپنے ساتھ رکھیں۔ عرب ٹی وی کے مطابق وزارت نے کہا ہے کہ ڈیجیٹل حج کارڈ کی اہمیت سے ہر عازم حج کا واقف ہونا انتہائی ضروری ہے۔ وزارت حج و عمرہ اور عازمین کی آگاہی سینٹر نے عازمین حج کو آگاہی فراہم کرنے اور انہیں نسک کارڈ کی اہمیت سے مطلع کرنے کیلیے مشترکہ طورپر خصوصی مہم شروع کی ہے۔وزارت کا کہنا تھا کہ عازمین حج مکہ مکرمہ یا مدینہ منورہ میں قیام کے دوران جب بھی اپنی رہائش سے باہر جائیں لازمی طورپر اپنے ہمراہ رکھیں اور جب بھی کوئی سرکاری اہلکار کارڈ طلب کرے تو اسے کارڈ دکھایا جائے۔ نسک کارڈ میں عازم حج کے بارے میں جملہ تفصیلات فراہم کی گئی ہیں جس میں مکہ مکرمہ اور مدینہ منورہ میں ان کی عارضی رہائش کا مقام اور مشاعر مقدسہ ( وادی منی ، عرفات اور مزدلفہ ) میں ان کے خیموں کے بارے میں معلومات موجود ہیں۔نسک کارڈ میں موجود کیوآر کوڈ کو سکین کرتے ہی تمام معلومات سرکاری اہلکاروں کے سسٹم پر ظاہر ہوجاتی ہیں جس سے عازمین اگر اپنی رہائشی عمارت کا مقام بھول جائیں تو انہیں با آسانی وہاں پہنچایا جاسکتا ہے۔ واضح رہے کہ بیرون ممالک سے آنے والے عازمین حج کے نسک کارڈز ان کے ممالک کے حج مشنز کے ذریعے عازمین کو فراہم کئے جاتے ہیں جبکہ اندرون مملکت سے فریضہ حج کے لئے جانے والوں کے نسک کارڈز وزارت حج وعمرہ کی جانب سے لائسنس یافتہ لوکل حج سروسز گروپس فراہم کرتے ہیں۔
