اسلام آباد(این این آئی)سپیکر قومی اسمبلی نے کہا ہے کہ نیلم جہلم پراجیکٹ پر حملہ کرنے پر بھارت کے خلاف عالمی عدالت میں جانا چاہیے۔جمعہ کوقومی اسمبلی کا اجلاس سپیکر سردار ایاز صادق کی صدارت میں شروع ہوا، جس میں وقفہ سوالات کے دوران رکن اسمبلی شگفتہ جمانی نے کہا کہ نیلم جہلم پراجیکٹ بند پڑا ہے، وجہ کیا ہے؟۔وفاقی وزیر برائے آبی وسائل معین وٹو نے بتایا کہ نیلم جہلم پراجیکٹ کی 2 ٹنلز 2024 میں کلیپس ہو گئی تھیں،وزیراعظم نے دورہ کیا اور کمیٹی تشکیل دی،ایک اور ہائی پاور کمیٹی تشکیل دی گئی ہے، اب تک اس پر مسلسل کام ہو رہا ہے،تحقیقات بھی جاری ہیں،ابتدائی رپورٹس تیار ہوگئی ہیں،2 سال میں یہ شروع جائے گا۔ملک عامر ڈوگر نے کہا کہ پتا چلا ہے اس منصوبے پر بھی بھارت نے حملہ کیا، اس سے کتنا نقصان ہوا؟،کیا ہم انٹرنیشنل کورٹ میں جا رہے ہیں؟، جس پرسپیکر قومی اسمبلی نے کہا کہ ہمیں انٹرنیشنل کورٹ میں چلے جانا چاہیے۔وفاقی وزیر نے کہا کہ اس سلسلے میں حکومت کی طرف سے جواب دیا جارہا ہے،اس کے سدباب کیلئے پراپر فورم سے رجوع بھی کیا گیا ہے، اس سے جواب مانگا گیا ہے، اسے ہمارا موقف تسلیم کرنا پڑے گا۔وقفہ سوالات کے دوران وزیراعظم کے معاون خصوصی ڈاکٹر مختار احمد نے جواب دیتے ہوئے کہا کہ اگر دوائیوں کی قیمتیں بہت زیادہ بڑھائی گئی ہیں تو وزیر اعظم کو آگاہ کیا جائے گا،ایک مہینے میں رپورٹ آجائے گی،قلت کی شکایات کے حوالے سے میں معاملہ دیکھ لوں گا، اگر ایک نام سے کوئی دوائی نہیں مل رہی تو دوسرے نام ضرور مل رہی ہے۔
