اسلام آباد (این این آئی)صدر مملکت آصف علی زرداری نے چین کے ساتھ سفارتی تعلقات کے قیام کی 74 ویں سالگرہ پر پاکستان اور چین کے عوام کو مبارکباد دیتے ہوئے کہاہے کہ چین کے ساتھ تعلقات پاکستان کی خارجہ پالیسی کا اہم جزو ہیں، پاکستان ”ون چائنا”پالیسی کے اصولی مؤقف کا مضبوط حامی ہے۔ ایوان صدر سے جاری اعلامیہ کے مطابق صدر مملکت نے کہاکہ پاکستان چین کے ساتھ اپنے تاریخی تعلقات کو قدر کی نگاہ سے دیکھتا ہے ۔انہوںنے کہاکہ چین کے ساتھ تعلقات پاکستان کی خارجہ پالیسی کا اہم جزو ہیں، پاکستان ”ون چائنا”پالیسی کے اصولی مؤقف کا مضبوط حامی ہے۔انہوںنے کہاکہ گزشتہ 7 دہائیوں کے دوران دونوں ممالک کے مابین تعلقات مضبوط سے مضبوط تر ہوئے ۔ انہوںنے کہاکہ پاکستان اور چین آہنی بھائی اور تزوایراتی تعاون شراکت داری میں بندھے ہیں۔انہوںنے کہاکہ پاکستان اور چین کے مابین سدا بہار دوستی ہے، ہر مشکل وقت میں پاکستان کا ساتھ دینے پر چینی حکومت اور عوام کے مشکور ہیں۔ انہوںنے کہاکہ پاکستان کی معاشی و سماجی ترقی میں چین کا اہم کردار ہے ،پاک ـ چین تعلقات باہمی اعتماد ، احترام اور خیر سگالی کے جذبات پر مبنی ہیں۔ صدر مملکت نے کہاکہ دونوں برادر ممالک مشترکہ خوشحالی ، امن و استحکام اور خطے میں روابط کے فروغ کے خواہاں ہیں، دونوں ممالک خطے اور دنیا کو درپیش چیلنجز سے نمٹنے کیلئے مل کرکام کرتے رہیں گے۔ انہوںنے کہاکہ چین نے پاکستان کے دفاعی شعبے کی مضبوطی میں اہم کردار ادا کیا ہے ، پاکـچین اقتصادی راہداری دونوں ممالک کے مابین تعلقات کی درخشاں مثال ہے۔ صدر مملکت نے کہاکہ پاک ـچین اقتصادری راہداری نے پاکستان کی معیشت ، بنیادی ڈھانچے اور توانائی کے شعبے پر مثبت اثرات چھوڑے ہیں۔ صدر مملکت نے کہاکہ پاکستان معیشت، ٹیکنالوجی ، دفاع، تعلیم اور تجارت کے شعبوں میں دوطرفہ تعلقات کو مزید وسعت دینے کا خواہاں ہے۔
