اسلام آباد(این این آئی)وفاقی وزیر منصوبہ بندی احسن اقبال نے کہاہے کہ آئندہ مالی سال کے بجٹ میں ترقیاتی بجٹ کی رقم رواں سال کے مقابلے میں 100 ارب روپے کم ہے۔تفصیلا ت کے مطابق وفاقی وزیر احسن اقبال کی زیر صدارت سالانہ پلان کوآرڈینیشن کمیٹی کے اجلاس میں آئندہ مالی سال کیلئے جی ڈی پی گروتھ 4.2 فیصد رکھنے، زرعی شعبے کی گروتھ کا ہدف 4.5 فیصد رکھنے، لائیو اسٹاک کی گروتھ کا ہدف 4.2 فیصد اور صنعتی شعبے کی گروتھ کا ہدف 4.3 فیصد رکھنے کی تجویز سامنے آئی۔اس موقع پر احسن اقبال نے کہاکہ آئندہ مالی سال کے بجٹ میں ترقیاتی بجٹ کیلئے 1000 ارب روپے مختص ہوں گے، بلوچستان کو 250 ارب روپے دیے جائیں گے، ترقیاتی بجٹ کی رقم رواں سال کے مقابلے میں 100 ارب روپے کم ہے۔وفاقی وزیرنے کہاکہ قومی نوعیت کے حامل اور پانی کے منصوبوں کو ترجیح دی جائے گی، بھارت کی دھمکیوں کے بعد دیامر بھاشا ڈیم کی جلد تعمیر لازم ہوگئی ہے، قراقرم ہائی وے فیز ٹو کے لیے فنڈز مختص کیے جائیں گے، این 25 کراچی کوئٹہ چمن شاہراہ کی تعمیر کی جائے گی، حیدر آباد سکھر موٹروے بھی ترجیحات میں شامل ہے۔
