اسلام آباد (این این آئی) سابق صدر آصف علی زر داری نے پاکستان تحریک انصاف کے چیئر مین عمران خان کے متنازع بیان پر سخت تشویش کا اظہار کرتے ہوئے کہاہے کہ قوم اب ملک میں انتشار پھیلانے والے شخص سے واقف ہے، سب کو انسان اور حیوان کا پتا چل گیا ہے۔ اپنے بیان میں پاکستان پیپلز پارٹی کے شریک چیئرمین آصف علی زرداری نے کہا کہ قوم اب ملک میں انتشار پھیلانے والے شخص سے واقف ہے، آج سب کو انسان اور حیوان کا پتا چل گیا ہے۔انہوںنے کہاکہ اس شخص نے ملک کو کمزور کرنے کا کہیں سے ٹھیکا لیا ہوا ہے جو ہمارے جیتے جی نہیں ہوسکتا، ہم اپنے اداروں اور جرنیلوں کو اس شخص کی ہوس کی خاطر متنازع نہیں بننے دیں گے، ہمارے ہر سپاہی سے لے کر جرنیل تک ہر ایک بہادر اور محبت وطن ہے۔سابق صدر نے خیبرپختونخوا اور پنجاب کی حکومتوں کو سیلابی سرگرمیوں میں بڑھ چڑھ کر حصہ نہ لینے پر بھی تنقید کا نشانہ بناتے ہوئے کہا کہ ہر جگہ صرف وفاقی حکومت ہی نظر آتی ہے۔
