اسلام آباد (این این آئی)وفاقی وزیر برائے ماحولیاتی تبدیلی سینیٹر شیری رحمان نے کہا ہے کہ آڈیو لیکس سامنے آنے کے بعد عمران خان کو اپنے بیانیے پر قوم سے معافی مانگنی چاہیے تھی لیکن وہ معافی مانگنے کے بجائے احتجاج کے حلف لے رہے۔ اپنے بیا ن میں شیری رحمن نے کہاکہ ہر کیس میں قبل از گرفتاری ضمانت لیکر عمران خان ”جیل بھرو تحریک”کی دھمکیان دے رہے، عمران خان چاہتے ہیں لوگ جیل جائے وہ خود نہیں۔ انہوںنے کہاکہ قوم کو یاد رکھنا چاہیے کہ ”عمران بچائو تحریک”اور ایم آر ڈی میں فرق ہے۔ انہوںنے کہاکہ ”جیل بھرو تحریک”کی باتیں کر کے عمران خان شہید محترمہ بینظیر بھٹو جیسے قائد نہیں بن جاتے۔ انہوںنے کہاکہ حقیقی آزادی کا نعرہ لگا کر یہ اپنی ذاتی لڑائی لڑ رہے، اس ذاتی لڑائی میں انہوں ہر لیکر کراس کی ہے۔ وفاقی وزیر نے کہاکہ آڈیو لیکس میں ان کے قول و فعل میں تضاد واضح ہو چکا ہے، پوری قوم نے دیکھ لیا ان کے چہرے کے پیچھے چہرے چھپے ہوئے۔شیری رحمن نے کہاکہ یہ خود ایک جیتے جاگتے اور سب سے بڑے ڈیپ فیک ہیں۔ وفاقی وزیر نے کہاکہ کیا چیرٹی کے نام پر فنڈنگ، سائفر سازش، غداری بیانیہ، توشا خانہ اور اداروں کو جانور اور چوکیدار کہنا بھی ڈیپ فیک ہے؟
