اسلام آباد(این این آئی) ایم ڈی آئی ایم ایف نے حکومتی پالیسیوں کی تعریف کرتے ہوئے پاکستان سے تعاون جاری رکھنے کی یقین دہانی کرائی ہے ۔وفاقی وزیر خزانہ اور محصولات سینیٹر محمد اسحاق ڈار نے واشنگٹن ڈی سی میں آئی ایم ایف کی ڈپٹی منیجنگ ڈائریکٹر محترمہ اینٹونیٹ سائیہ سے ملاقات کی۔ وزیرخزانہ نے انہیں پاکستان میں غیر معمولی سیلاب سے ہونے والے نقصانات سے آگاہ کیا۔ انہوں نے معیشت کو مستحکم اورپائیداربنانے کے علاوہ اس کی لچکدار بحالی کے لیے حکومت پاکستان کے وژن سے آگاہ کیا۔ ڈی ایم ڈی آئی ایم ایف نے حکومت کی پالیسیوں کو سراہا اور آئی ایم ایف کی جانب سے پاکستان سے تعاون جاری رکھنے کی یقین دہانی کرائی۔وزیر خزانہ نے ورلڈ بینک کے صدر مسٹر ڈیوڈ مالپاس سے ملاقات کے دوران پاکستان کی سماجی اقتصادی ترقی میں مسلسل تعاون پر بینک کا شکریہ ادا کیا۔ انہوں نے غیرمعمولی تباہ کن سیلاب کے بعد بچاؤ اور امدادی کارروائیوں میں مدد پر عالمی بینک کا شکریہ ادا کیا۔ صدر مالپاس نے یقین دلایا کہ بینک پاکستان کو سیلاب کی وجہ سے سماجی و اقتصادی چیلنجوں پر قابو پانے میں مدد کرنے کے لیے حکومت پاکستان کے ساتھ مل کر کام کرتا رہے گا۔وزیر خزانہ نے مسٹر مارٹن رائسر، نائب صدر، SAR، ورلڈ بینک کے ساتھ ملاقات کے دوران نائب صدر رائسر کا پاکستان کے دورے پر شکریہ ادا کیا تاکہ سیلاب سے ہونے والی تباہی کو پہلے دیکھا جا سکے۔ اس دورے نے تباہ کن سیلاب سے ہونے والے زبردست نقصانات کا اندازہ لگانے میں مدد کی۔ نائب صدر نے یقین دلایا کہ بینک ان معاشی مشکلات پر قابو پانے میں پاکستان کی حمایت جاری رکھے گا جن کا ملک کو سامنا ہے۔وزیر نے اسلامی ترقیاتی بینک کے صدر ڈاکٹر محمد سلیمان الجاسر سے ملاقات کی اور اسلامی ترقیاتی بنک کے پاکستان کے ساتھ مسلسل روابط پر شکریہ ادا کیا۔ انہوں نے اس بات کو سراہا کہ پاکستان اور بینک کئی دہائیوں سے قابل اعتماد شراکت دار رہے ہیں۔ صدر الجاسر نے سیلاب زدگان کو ریلیف فراہم کرتے ہوئے معیشت کو مستحکم کرنے کے لیے حکومت پاکستان کی جانب سے کیے جانے والے اقدامات کو سراہا۔وزیر خزانہ نے ڈوئچے بینک اور جے پی مورگن کی قیادت کے ساتھ اپنی ملاقات میں معیشت کو مستحکم کرنے کے ساتھ ساتھ سیلاب کے متاثرین کو ریلیف فراہم کرنے کے حکومتی وژن کی وضاحت کی اور یقین دلایا کہ حکومت پاکستان آئی ایم ایف کے پروگرام کو مکمل کرنے میں پرعزم ہے۔وفد نے ریٹنگ ایجنسیوں سے بھی ملاقاتیں کیں اور سالانہ اجلاسوں کے دوران منعقد ہونے والی کئی تقریبات میں شرکت کی۔وفد نے پاکستان ہاؤس میں پاکستانی پیشہ ور افراد کے ایک متنوع گروپ کے ساتھ بھی ملاقات کی جن میں معروف کاروباری شخصیات، ٹیک انٹرپرینیورز اور دیگر شامل تھے۔وزیر خزانہ واشنگٹن ڈی سی میں ہونے والے آئی ایم ایف/ورلڈ بینک کے 2022 کے سالانہ اجلاسوں میں پاکستان کے وفد کی قیادت کر رہے ہیں۔ دیگر مندوبین میں وفاقی وزیر برائے اقتصادی امور سردار ایاز صادق، وزیر مملکت برائے خزانہ و محصولات ڈاکٹر عائشہ غوث پاشا، گورنر سٹیٹ بینک آف پاکستان جمیل احمد، سیکرٹری خزانہ حمید یعقوب شیخ، ڈاکٹر کاظم احمد شامل ہیں۔ سیکرٹری اقتصادی امور ڈویڑن نیاز اور، ایڈیشنل سیکرٹری فنانس ڈویڑن جناب علی طاہربھی ہمراہ تھے۔
