اسلام آباد (این این آئی)وزیر دفاع خواجہ محمد آصف نے کہا ہے کہ بھارتی میڈیا اس وقت عمران خان کی اتنی سپورٹ کر رہا ہے جتنی مودی کی بھی نہیں کرتا۔سوشل میڈیا پر بیان جاری کرتے ہوئے خواجہ آصف نے کہا کہ پاک فوج اور آئی ایس آئی کے خلاف عمران خام جو فرمائشی زبان بول رہا ہے ، بھارتی میڈیا اسے فل کوریج دے رہا ہے۔انہوں نے کہا کہ عمران خان پاکستان کے ازلی دشمن کا ترجمان بن گیا۔ وفاقی وزیر احسن اقبال نے کہا کہ عمران نیازی کے حالیہ بیانات سے اس بات پر مہر تصدیق ثبت ہو گئی ہے کہ شہباز گِل نے فوج کے خلاف ایک چینل پر جو بیان دیا تھا اس کا ماسٹر مائنڈ عمران نیازی ہی تھا۔واضح رہے کہ پاکستان تحریک انصاف کے چیئرمین عمران خان اداروں کے خلاف بات کرنے پر بھارتی میڈیا میں مقبول ہوگئے۔پی ٹی آئی رہنما فیاض الحسن چوہان کو بھارتی چینل کے اینکرپرسن نے کہا کہ بھارت کو عمران خان کا ایجنڈا معلوم ہے، عمران خان آئی ایس آئی کو ایکسپوز کرنا چاہتے ہیں اور اسی لیے وہ بھارت میں مقبول ہیں۔
