راولپنڈی ( این این آئی) برطانوی ہائی کمشنر کرسچین ٹرنر پاکستان اور انگلینڈ کا ٹیسٹ میچ دیکھنے کے لیے رکشے میں پنڈی اسٹیڈیم پہنچے ۔سماجی رابطے کی ویب سائٹ ٹوئٹر پر جاری کیے گئے ویڈیو پیغام میں کرسچین ٹرنر نے کہاکہ انگلینڈ اور پاکستان نے کرکٹ کی دنیا میںدھوم مچا دی ہے۔پاکستان میں ہونیوالی ٹی ٹونٹی سیریز میں دونوں ٹیموں کے درمیان دلچسپ مقابلہ ہوا اور ٹی ٹونٹی ورلڈ کپ کا فائنل بھی یادگار تھا۔کرسچین ٹرنر نے کہا کہ دونوں بار انگلینڈ کی ٹیم بازی لے گئی اور اب سب کی نظریں ٹیسٹ سیریز پر ہیں۔ان کا یہ بھی کہنا ہے کہ یکم سے 21دسمبر تک جیت اسی کی ہوگی جو گرم جوشی کا مظاہرہ کرے گا، لڑکوں جم کر کھیلنا کیونکہ ہے جذبہ جنون تو ہمت نہ ہار۔ویڈیو میں دیکھا جاسکتا ہے کہ کرسچین ٹرنر کے عقب میں ایک رکشہ بھی موجود ہے جس کاڈرائیوران کی گفتگو ختم ہوتے ہی پنجابی میں پوچھتا ہے کدھر جانا ہے؟۔برطانوی ہائی کمشنر نے بھی اس پر پنجابی میں کہا کہ راجہ جی پنڈی جلساں تے میچ تکساں۔
