وزیراعظم محمد شہباز شریف سے ابوظہبی چیمبر آف کامرس کے وفد کی ملاقات ، سرمایہ کاری پر گفتگو

0
239

اسلام آباد (این این آئی)وزیراعظم شہبازشریف نے کہاہے کہ یو اے ای کی قیادت کے وژن اور دانشمندی نے مختصر عرصے میں متحدہ عرب امارات کو اقتصادی سرگرمیوں اور سیاحت کا مرکز بنایا ہے،متحدہ عرب امارات کو ایک اہم اسٹریٹجک اور اقتصادی شراکت دار سمجھتے ہیں، جو خطے میں امن، استحکام اور اقتصادی ترقی کو یقینی بنانے میں اہم کردار ادا کر رہا ہے اور مشترکہ سماجی و اقتصادی ترقی کی صلاحیت رکھتا ہے،پاکستان اور متحدہ عرب امارات کے درمیان چیمبر ٹو چیمبر تعاون کو بڑھانے کی ضرورت ہے۔وزیراعظم محمد شہباز شریف سے ابوظہبی چیمبر آف کامرس کے وفد نے جمعہ کو ابوظہبی میں ملاقات کی۔ وفد کی سربراہی ابوظہبی چیمبر آف کامرس کے چیئرمین نے عبداللہ محمد المزروعی کی۔ وفد سے گفتگو کرتے ہوئے وزیراعظم نے کہا کہ انہیں یو اے ای کے ایک اہم چیمبر آف کامرس سے مل کر خوشی ہوئی۔ انہوں نے کہا کہ ابوظہبی چیمبر نے متحدہ عرب امارات کی اقتصادی ترقی میں اہم کردار ادا کیا ہے۔ وزیراعظم نے اس بات پر خوشی کا اظہار کیا کہ چیمبر میں پاکستانی ممبران بھی موجود ہیں۔ وزیر اعظم نے کہا کہ یہ ہمارے لیے فخر کی بات ہے کہ ایک پاکستانی بزنس مین کو اس معزز چیمبر کا بورڈ ممبر رہنے کا اعزاز رہا ہے جو اس حقیقت کا مظہر ہے کہ پاکستانی کمیونٹی متحدہ عرب امارات کی ترقی میں اہم کردار ادا کر رہی ہے۔ وزیراعظم نے کہا کہ یو اے ای کی قیادت کے وژن اور دانشمندی نے مختصر عرصے میں متحدہ عرب امارات کو اقتصادی سرگرمیوں اور سیاحت کا مرکز بنایا ہے۔ انہوں نے کہا کہ ہم متحدہ عرب امارات کو ایک اہم اسٹریٹجک اور اقتصادی شراکت دار سمجھتے ہیں، جو خطے میں امن، استحکام اور اقتصادی ترقی کو یقینی بنانے میں اہم کردار ادا کر رہا ہے اور مشترکہ سماجی و اقتصادی ترقی کی صلاحیت رکھتا ہے۔ وزیراعظم نے کہا کہ انہیں یہ جان کر خوشی ہوئی کہ حالیہ دنوں میں پاکستان اور متحدہ عرب امارات کے درمیان دوطرفہ تجارت میں نمایاں اضافہ ہوا ہے۔ انہوں نے کہا کہ پاکستان اور متحدہ عرب امارات کے درمیان چیمبر ٹو چیمبر تعاون کو بڑھانے کی ضرورت ہے اور ہم پاکستانی چیمبرز پر زور دیں گے کہ وہ ابوظہبی چیمبر ت سے نئے روابط استوار کریں۔ وزیر اعظم نے ابوظہبی چیمبر کے اراکین کو اپنے کاروبار کو بڑھانے کے بہترین مواقع کا تجربہ کرنے کے لیے پاکستان کے دورہ کی دعوت دی.وزیراعظم نے کہا کہ ہنرمند افرادی قوت کو متحدہ عرب امارات بھیجنا ان کی حکومت کی اولین ترجیحات میں شامل ہے۔ ابوظہبی چیمبر آف کامرس کے اراکین نے پاکستان میں کاروبار کرنے اور سرمایہ کاری میں دلچسپی ظاہر کی۔