اسلام آباد(این این آئی)الیکشن کمیشن نے پیپلز پارٹی ،(ن)لیگ اور جے یو آئی (ف)کی اسکروٹنی میں تاخیر پر پی ٹی آئی کے اعتراضات مسترد کردئیے۔الیکشن کمیشن نے پیپلزپارٹی، مسلم لیگ (ن)اور جے یو آئی ف کے فنڈز کی اسکروٹنی پرپیشرفت رپورٹ اسلام آباد ہائیکورٹ میں جمع کرائی جو165صفحات پر مشتمل ہے۔الیکشن کمیشن کی جانب سے تینوں جماعتوں کی جانب سے اسکروٹنی میں تاخیر پر پی ٹی آئی کے اعتراضات مسترد کردئیے گئے ہیں۔رپورٹ میں باربار وکلا کی تبدیلی، التواکی درخواستیں اور اسکروٹنی ممبران کی عدم دستیابی تاخیر کی اہم وجہ قرار دی گئی ہے۔الیکشن کمیشن کی رپورٹ میں کہا گیا کہ اسکروٹنی کمیٹی کے ممبران کی تبدیلی بھی تاخیر کی ایک وجہ بنی، ایک کمیٹی ممبر کورس کیلئے گیا اور نئے ممبر کی تعیناتی میں4ماہ لگ گئے،13دسمبر2021کو ڈپٹی آڈیٹر جنرل مسعود اخترکی ریٹائرمنٹ کی وجہ سے بھی کمیٹی غیرفعال ہوئی۔
