لاہو ر( این این آئی) نگران وزیراعلیٰ پنجاب محسن نقوی کی زیر صدارت پنجاب سیف سٹیز اتھارٹی کا اجلاس ہوا جس میں سیف سٹیز اتھارٹی کے ایک ارب 42کروڑ روپے کے جاری ترقیاتی منصوبوں پر پیش رفت کا جائزہ لیا گیا ۔ اجلاس میں انسپکٹر جنرل پولیس پنجاب،ایڈیشنل چیف سیکرٹری ہوم، سی سی پی او، سیکرٹری فنانس، چیئرمین پی اینڈ ڈی بورڈ، ڈی جی پی آر اور متعلقہ حکام نے شرکت کی ۔ایم ڈی پنجاب سیف سٹیز اتھارٹی کامران خان نے اجلاس کے شرکا کو تفصیلی بریفنگ دی۔اجلاس میں لاہو ر میں 500نئے مقامات پر کیمروں کی تنصیب کے پروگرام کا جائزہ لیا گیا اور پنجاب سیف سٹیز اتھارٹی کے پولیس کمیونیکشن آفیسر کے سروس سٹرکچراورپے پیکیج پر غور کیا گیا ۔ محسن نقوی نے کہا کہ پی ایس ایل کی مانیٹرنگ کیلئے راولپنڈی اور ملتان کے کیمروں کو سیف سٹی لاہور سے منسلک کیا گیا ہے، 550 خصوصی کیمروں سے پی ایس ایل کی نگرانی کی جا رہی ہے، پی ایس ایل میچوں کیلئے فول پروف سکیورٹی کے انتظامات کئے گئے ہیں۔پی ایس ایل کے پرامن اور بہترین ماحول میں انعقاد کو یقینی بنایا جا رہا ہے۔انہوں نے انٹیلی جنٹ ٹریفک مینجمنٹ سسٹم کے ذریعے بہترین ٹریفک پلان دینے کی ہدایت کی ۔ نگران وزیراعلی محسن نقوی کی سیف سٹیز اتھارٹی کے کیمروں کی بحالی کیلئے تیز تر اقدامات کرنے کی ہدایت کی ۔ نگران وزیراعلی محسن نقوی نے پنجاب سیف سٹیز اتھارٹی سے متعلق دیگر امور کی منظوری بھی دی۔
