اسلام آباد(این این آئی) آئی ایم ایف نے پاکستان میں غیرقانونی سگریٹس کی خریدوفروخت سے 80 ارب کی ٹیکس چوری پر تشویش کا اظہار کیا ہے جبکہ وزیراعظم شہباز شریف نے نوٹس لیتے ہوئے عالمی ادارے کے تحفظات پر غیر قانونی سگریٹس کی فیکٹریوں کے خلاف کارروائی کی ہدایت کی ہے ۔ میڈیا رپورٹ کے مطابق پاکستان میں غیرقانونی سگریٹس کی خریدوفروخت سے 80 ارب روپے کی ٹیکس چوری ہونے پر آئی ایم ایف نے اظہارِ تشویش کیا جس پر وزیراعظم نے بھی نوٹس لیتے ہوئے غیر قانونی سگریٹ فیکٹریز کیخلاف کارروائی کی ہدایت کردی۔ذرائع کے مطابق دو درجن سے زائد سگریٹس مینوفیکچرنگ کمپنیاں تاحال ٹریک اینڈ ٹریس سسٹم میں شامل ہی نہیں۔ آئی ایم ایف کے تحفظات کے بعد وزیراعظم نے ایف بی آر کو تمام سگریٹ مینوفیکچرنگ کمپنیوں پر ٹریک اینڈ ٹریس سسٹم جلد مکمل کرنے کی ہدایت کی ہے،ایف بی آر ان لینڈ ریونیو انٹیلی جنس ٹیمیں غیرقانونی سگریٹس کی فیکٹریوں پر ریڈ کرینگی۔ ذرائع کے مطابق غیرقانونی سگریٹس کے خلاف کارروائی کی رپورٹ آئی ایم ایف کو بھی بھیجی جائیگی،وزارت خزانہ اور ایف بی آر کی جانب سے غیرقانونی سگریٹس کی خرید و فروخت پر وزیراعظم کو بریفنگ دی جائیگی،ایف بی آر غیرقانونی سگریٹس کے خلاف کارروائی کی ماہانہ رپورٹ وزیراعظم کو پیش کریگا۔
